Braziliýanyň milli ýygyndysynyň düzüminde 2 gezek dünýä çempiony bolan, “Real Madrid” hem-de “Inter” toparlarynyň ozalky hüjümçilerinden Ronaldo “Kruzeýro” futbol klubynyň täze eýesi boldy.
Bu barada 45 ýaşly ozalky futbolçy jemgyýetçilik torundan habar berdi. Geleşigiň bahasy barada maglumat berilmeýär. Ýerli metbugatyň maglumatyna görä, Ronaldo toparyň gymmatbahaly kagyzlarynyň 90 göterimini 70 million dollara satyn aldy. Ol bu babatda “Liwerpul” hem-de “Pittsburg Pingwinz” toparlarynyň eýelerinden öňürtdi.
Ronaldo häzirki wagtda Ispaniýanyň “Walýadolid” toparyna hem eýeçilik edýär. Bir döwürler futbolda uly meşhurlyk gazanan Ronaldo 1993-nji ýylda “Kruzeýro” toparynda futbol oýnap başlapdy. Soňra ol “PSW” toparyna geçdi. Soňra degşlilikde, “Barselona”, “Real”, “Milan” we “Inter” ýaly Ýewropanyň güýçli toparlarynda oýnady. Ol 2011-nji ýylda futbol durmuşyny tamamlapdy.
Şu ýylky möwsümiň netijelerine görä, “Kruzeýro” topary 48 utuk bilen Braziliýanyň çempionatynyň ikinji ligasynda 14-nji orny eýeledi.
Belu-Orizonte şäheriniň “Kruzeýro” topary Braziliýanyň iň meşhur klublaryndan biri – dört gezek Braziliýanyň futbol çempionatynyň çempiony, alty gezek Braziliýa kubogynyň eýesi we iki gezek “Copa Libertadores” kubogynyň ýeňijisidir.
Merkezi Aziýanyň daşary işler ministrleri üçin agşamlyk duşuşyk