Soňky ýyllarda ägirt uly tehnologiýa kompaniýalary robot önümçiligine hem uly maýa goýumlaryny goýýarlar. Bu babatda öňdebaryjylaryň biri hem Hytaýyň “Xiaomi” kompaniýasydyr.
Hytaý tehnologiýa ägirdi “Xiaomi” kompaniýasy “CyberDog” atly dört aýakly robot itini görkezdi. Ozal köplenç “Boston Dynamics” kompaniýasy tarapyndan işlenip düzülen “Spot” robot it barada wagtal-wagtal täzelikler internet neşirlerinde peýda bolýardy.
Olaryň hataryna goşulan “Xiaomi” kompaniýasynyň “CyberDog” atly dört aýakly robot iti ösen emeli aň bilen köp päsgelçilikleri aňsatlyk bilen ýeňip biler. Daşky gurşawdaky wakalara aňsatlyk bilen düşünýän we şoňa görä özüni alyp barýan it, hiç hili kynçylyksyz eýesiniň buýruklaryny ýerine ýetirip biler.
Sekuntda 3,2 metr tizlik bilen hereket edip bilýän “CyberDog” iti üstündäki datçikleriň kömegi bilen töweregindäki päsgelçilikleri aňsatlyk bilen kesgitleýär we şoňa görä hereket edýär.
“Xiaomi” kompaniýasy, ilkinji nobatda, kompaniýanyň janköýerleri, inženerler we robot höwesjeňleri üçin diňe 1000 sany robot it öndürer.
Hytaý kompaniýasy robotyň satuw bahasyny häzirlikçe 1500 dollar diýip yglan etse-de, çäklendirilen önümçilikden soň bahasy ýokarlanyp biler.