Ispaniýanyň milli ýygyndysy bilen dünýä we Ýewropa çempiony bolan Serhio Ramos Meksikanyň “Monterreý” topary bilen şertnama baglaşdy. Bu barada toparyň metbugat gullugy habar berýär.
Şertnamanyň möhleti barada maglumat berilmedi. 2024-nji ýylyň iýunyndan bäri Ramos Ispaniýanyň “Sewilýa” topary bilen şertnamasyny tamamlap, erkin futbolçy bolupdy.
Ramos 38 ýaşynda. Ol 2005-2021-nji ýyllarda Ispaniýanyň “Real Madrid” toparynda çykyş etdi. Ol bu toparda oýnan döwründe 4 gezek Çempionlar ligasynyň kubogyny gazandy. Ramos şol döwürde Ispaniýanyň 5 gezek çempiony boldy.
Ispan futbolçy 2021-2023-nji ýyllarda Fransiýanyň “PSŽ” toparynda oýnady. Bu toparda hem 2 gezek Fransiýanyň çempiony boldy.
Ramos Ispaniýa bilen 2010-njy ýylda dünýä çempiony, şeýle hem 2008-nji we 2012-nji ýyllarda Ýewropa çempiony boldy.