Russiýa Federasiýasynyň Prezidenti Wladimir Putin 23-nji martda koronawirus pandemiýasyna garşy sanjym boljakdygyny mälim etdi. Ol bu barada sanjym işleri boýunça sanly ulgam arkaly geçiren iş maslahatynda belläp geçdi. Rus metbugatyna görä, Russiýanyň Prezidentiniň metbugat sekretary Dmitriý Peskow Putiniň beýleki ýurtlaryň döwlet ýolbaşçylary ýaly aç-açanlykda sanjym bolmajakdygyny belledi.
Russiýanyň hökümeti iýul we awgust aýlaryna çenli köpçülikleýin immunitete ýetmegi meýilleşdirýär. Ýurtda bu görkezä ýetmek üçin zerur möçberde sanjymyň bardygy aýdyldy. Şu ýylyň birinji ýarymyna çenli 80 million adamy sanjym etmek üçin ýeterlik mukdarda “Sputnik V” sanjymynyň öndüriljekdigi aýdyldy. Şeýle hem degişli döwre çenli “Epiwakkorona” sanjymynyň 5,5 million toplumynyň, “Kowiwak” sanjymynyň bolsa 0,8 million toplumy öndüriler.
55 ÝURTDA BELLIGE ALYNDY
“Sputnik V” sanjymynyň dünýäniň 55 ýurdunda bellige alnandygy, bu sanjymy bellige alan iň soňky ýurduň Mawrikiýa bolandygy bellenilip geçildi.
Bu sanjymyň önümçiligiň gerimini giňeltmek hem göz öňünde tutulýar. Hindistanda bu sanjymyň 100 milliona adama ýetmegi üçin zerur bolan möçber öndürilmekçi. Şeýle hem umumylykda, daşary ýurtly öndürijiler bilen her ýyl 700 million adama yeterlik derejede öndürmek boýunça ylalaşyklar baglaşyldy. Mundan başga-da, 10 ýurt bilen sanjymyň önümçilik tehnologiýasyny paýlaşmak babatda ylalaşygyň gazanylandygy aýdyldy.
BURNA DAMDYRYLÝAN WE “SPUTNIK LAÝT” SANJYMY
“Sputnik V” sanjymynyň ýeňil görnüşi hasaplanýan “Sputnik Laýt” sanjymynyň kliniki synaglary tamamlandy. Ony hem hasaba almak üçin degişli resminamalar taýýar edildi. Ony aprel ýa-da maý aýynda raýat dolanyşygyna goýbermek meýilleşdirilýär.
“Sputnik V” sanjymynyň hem-de “Epiwakkorona” sanjymynyň burna damdyrylýan görnüşini öndürmek hem meýilleşdirilýär.
“Sputnik V” sanjymynyň burna damdyrylýan görnüşiniň kliniki synaglaryna başlamak göz öňünde tutulyp, ilkinji nobatda onuň 3 we 4 ýaşa çenli çagalar üçin niýetlenjekdigi bellenildi.