“Pari Sen-Žermen” topary Fransiýanyň futbol boýunça Superkubogy ugrundaky duşuşykda “Marsel” toparyndan üstün çykdy. Duşuşyk Kuweýtde geçirildi.
Oýnuň esasy wagty 2:2 hasabynda deňme-deň tamamlandy. Ýeňiji toparyň düzüminde Usman Dembele (13-nji minut) we Gonsalu Ramuş (90+5-nji minut) tapawutlandy. Utulan toparda Meýson Grinwud (76-njy minut, penalti) gol geçirdi. 87-nji minutda PSŽ-niň goragçysy Wilýam Paço topy öz derwezesine geçirdi.
11 metrlik jerime uruglary tapgyrynda pariž topary 4:1 hasabynda ýeňiş gazandy.
Duşuşyga şikes sebäpli PSŽ-niň russiýaly derwezebany Matweý Safonow gatnaşmady.
“PSŽ” Fransiýanyň Superkubogyny 14-nji gezek gazandy we bu ýaryşyň rekordydyr. Pariž kluby ýaryşyň soňky dört tapgyrynda hem ýeňiş gazandy. Bu ugurda ikinji orunda barýan “Lion” toparydyr, ol 8 gezek kubogyň eýesi boldy.
Ýaryşa Fransiýanyň çempiony we ýurduň kubogynyň ýeňijisi gatnaşýar. Geçen möwsümde iki ýaryşyň hem ýeňijisi PSŽ bolansoň, “Marsel” Fransiýanyň Superkubogy ugrundaky oýna milli çempionatyň kümüş medalçysy hökmünde gatnaşdy.
Geçen möwsümde ähli kuboklary gazanan “PSŽ” topary kuboklaryň toparyna öwrüldi. Toparyň ispan tälimçisi Luis enrika hem bu topar bilen 10-njy kubogyny gazandy. Ol hem 2.5 ýylyň içinde bolup geçdi. Ispan tälimçi 2023-nji ýylda toparyň tälimçiligine bellenipdi.
Şondan bäri ol bu topar bilen 3 gezek Fransiýanyň Superkubogyny, 2-nji gezek Fransiýanyň kubogyny, 1 gezek Çempionlar ligasynyň kubogyny, UEFA-nyň Superkubogyny we Yklymara kubogy gazandy.
Umumylykda bolsa, Enrika tälimçilik karýerasynda 19 kubogyň eýesi boldy.