ABŞ-nyň Prezidenti Jo Baýden 5-nji noýabrda geçiriljek prezident saýlawlary üçin wagtyndan öň sesini berdi. Prezident Baýden munuň üçin öz dogduk mekany bolan Delawerdäki saýlaw uçastogynda sesini mynasyp gören dalaşgärine berdi.
ABŞ-nyň häzirki Prezidenti Baýden Delawer ştatynyň Wilmington şäherindäki saýlaw uçastogyna bardy. Baýdeniň ses bermek işine gatnaşmagyna Amerikanyň metbugaty uly gyzyklanma bildirdi. Ses bermek üçin saýlaw uçastogyna baran Baýden beýleki saýlawçylar ýaly nobata durup, öz nobatynda sesini berdi.
Şeýle hem Baýden saýlaw uçastogynda beýleki saýlawçylar bilen söhbetdeş boldy. Soňra ol şahsyýetnamasyny görkezip, bellige alnandan soň elektron goluny çekdi. Baýden ses bermek üçin göz öňünde tutulan enjamda sesini berdi.
Baýden sesini berenden soňra özüne garaşyp oturan žurnalistler bilen söhbetdeş bolup, olaryň sowallaryna jogap berdi.