Şu gün hormatly Prezidentimiz Gurbanguly Berdimuhamedow bilen Pakistan Yslam Respublikasynyň Prezidenti Arif Alwiniň arasynda telefon arkaly söhbetdeşlik boldy.
Döwlet Baştutanymyz ikiçäk söhbetdeşlik üçin dörän mümkinçilige kanagatlanma bildirip, Türkmenistanda Saýlawlary we sala salşyklary geçirmek boýunça merkezi toparyň 12-nji martda geçirilen Prezident saýlawlarynyň yglan eden netijelerine laýyklykda, Serdar Berdimuhamedowyň ýurduň täze Prezidenti wezipesine saýlanylandygyny habar berdi. Şunuň bilen birlikde, milli Liderimiz Türkmenistanyň Milli Geňeşiniň Halk Maslahatynyň Başlygy wezipesinde işini dowam etjekdigini belledi.
Hormatly Prezidentimiz Gurbanguly Berdimuhamedow pursatdan peýdalanyp, Pakistanyň Liderine oňyn döwletara gatnaşyklary we ýola goýlan netijeli hyzmatdaşlygy ösdürmäge goşant şahsy goşandy üçin minnetdarlyk bildirdi. Bellenilişi ýaly, geçen ýyllaryň dowamynda döwletleriň Baştutanlary iki doganlyk ýurtlaryň we olaryň dostlukly halklarynyň arasyndaky hemmetaraplaýyn gatnaşyklary pugtalandyrmak ugrunda netijeli iş alyp bardylar.
Şunuň bilen baglylykda, milli Liderimiz dostluk, doganlyk, deňhukuklylyk we özara düşünişmek däplerine esaslanýan türkmen-pakistan hyzmatdaşlygynyň mundan beýläk-de ösdüriljekdigine we pugtalandyryljakdygyna ynam bildirdi.
Döwlet Baştutanymyz Pakistan Yslam Respublikasynyň Prezidentine berk jan saglyk, uzak ömür we ähli başlangyçlarynda üstünlikleri arzuw edip, telefony Türkmenistanyň täze saýlanylan Prezidentine berdi.
Prezident Arif Alwi Türkmen döwletiniň täze saýlanan Baştutany Serdar Berdimuhamedowy giň bäsleşik esasynda geçen ählihalk saýlawlaryndaky ynamly ýeňşi bilen tüýs ýürekden gutlap, möhüm we jogapkärçilikli döwlet wezipesinde uly üstünlikleri arzuw etdi.
Ýurdumyzyň täze saýlanan Prezidenti mähirli gutlaglar we iň gowy arzuwlar üçin tüýs ýürekden hoşallyk bildirip, milli Liderimiz Gurbanguly Berdimuhamedowyň başyny başlan syýasy ugruny mundan beýläk-de dowam etjekdigini nygtady. Şunuň bilen baglylykda, türkmen tarapynyň döwletara gatnaşyklaryny dürli ugurlarda mundan beýläk-de ösdürmäge we pugtalandyrmaga taýýardygy tassyklanyldy.
Söhbetdeşler Türkmenistanyň we Pakistan Yslam Respublikasynyň köpasyrlyk dostluk we doganlyk gatnaşyklaryna ygrarlydyklaryny tassyklap, soňky ýyllarda ýola goýlan netijeli hyzmatdaşlygyň ýakyn wagtlarda öz mynasyp dowamyny tapjakdygyna özara ynam bildirdiler.
Telefon arkaly söhbetdeşligiň ahyrynda täze saýlanan Prezident Serdar Berdimuhamedow dostlukly döwletiň ýolbaşçysyna berk jan saglyk we jogapkärli işinde üstünlikleri, Pakistanyň doganlyk halkyna bolsa parahatçylyk, rowaçlyk we abadançylyk arzuw etdi.
Serdar Berdimuhamedow bilen Ilham Aliýewiň arasynda telefon arkaly söhbetdeşlik