Özbegistanyň Hökümeti Türkmenistanyň üsti bilen Eýran halkyna ynsanperwer kömegini iberdi. Ýükler birnäçe ýük awtoulagy arkaly Türkmenistanyň çäginden üstaşyr geçirilip eltildi diýip, Özbegistanyň Daşary işler ministrliginiň metbugat gullugy habar berdi.
Ynsanperwer kömeginiň düzüminde un, tüwi, gant, makaron önümleri, ösümlik ýagy, konserwirlenen iýmitler ýaly azyk önümleri, şeýle hem dermanlar we lukmançylyk serişdeleri bar. Ynsanperwer ýüki ýük awtoulaglary bilen Eýranyň Deregez şäherine ýetirildi we ony ýerli häkimiýetler garşylady.
Ynsanperwer ýüki kabul etmek dabarasyna Deregez şäheriniň häkimi Mojtaba Bazmara, Eýranyň Daşary işler ministrliginiň Horasan-Rezawi welaýatyndaky wekilhanasynyň ýolbaşçysy, ministriň geňeşçisi Ali Masumifar, şeýle hem Eýranyň Türkmenistandaky ilçisi Ali Mojtaba Ruzbehani hem-de Özbegistanyň Türkmenistandaky ilçisi Rawşanbek Alimow gatnaşdy.
Eýran tarapy berlen goldaw üçin Özbegistanyň Prezidentine minnetdarlyk bildirip, bu çäräniň iki ýurduň arasyndaky dostluk, raýdaşlyk we özara goldaw däpleriniň aýdyň beýanydygyny nygtady.