Azerbaýjan Respublikasynyň daşary işler ministri Jeýhun Baýramow Türkmenistan-Türkiýe-Azerbaýjan döwlet Baştutanlarynyň birinji sammitiniň taryhy ähmiýete eýedigini belledi.
Azerbaýjanyň daşary syýasat edarasynyň ýolbaşçysy düýn “Awaza” milli syýahatçylyk zolagyndaky “Gämi” myhmanhanasynda Türkmenistan-Türkiýe-Azerbaýjan daşary işler ministrleriniň duşuşygyna gatnaşypdy.
Ministr 2022-nji ýylda Azerbaýjanyň hem Türkmenistanyň hem-de Türkiýe Respublikasynyň arasyndaky ýola gýlan diplomatik gatnaşyklara 30 ýyl dolandygyny mälim etdi. Geçen döwürde ýurtlaryň arasyndaky gatnaşyklary ýokary derejede we okgunly ösüşe eýe bolandygyny belledi. Bu gatnaşyklaryň özeninde bolsa, umumy taryh, medeniýet we dil umumylyklarynyň bardygy mälim edildi.
Döwlet Baştutanlarynyň arasyndaky ýola goýlan özara ynanyşmagynyň möhümdigini bellän Jeýhun Baýramow ykjam gatnaşyklaryň ýurtlaryň arasyndaky gatnaşyklaryň okgunly ösüşine özüniň oňyn täsirini ýetirýändigini mälim etdi.
Awazadaky sammitiň taryhy ähmiýete eýedigini belläp, birinji sammitiň bilelikdäki beýannamasynyň, energetika, söwda, ykdysadyýet, gümrük, ylym, bilim, medeniýet ýaly ulgamlarda gol çekiljek üçtaraplaýyn resminamalaryň özara gatnaşyklary ösdürmäge gönükdirilen möhüm resminamalar boljakdygyny nygtady
Jeýhun Baýramow 3 ýurduň arasyndaky hyzmatdaşlygyň halkara we sebit guramalarynyň çäklerinde hem üstünlikli ösdürilýändigini aýtdy.