Urugwaýly hüjümçi Luis Suares “Inter Maýami” topary bilen täze şertnama baglaşdy. Bu barada toparyň metbugat gullugy habar berdi. Täze şertnama 2026-njy ýylyň ahyryna çenli niýetlenendir.
Suares 38 ýaşynda, ol 2024-nji ýyldan bäri “Inter Maýami” toparynda çykyş edýär. Klubuň düzüminde ol MLS-iň yzygiderli çempionatynyň ýeňijisi (2024) we MLS kubogynyň eýesi (2025) boldy. Iki möwsümde Suares ähli ýaryşlarda klub üçin 42 gol geçirdi, bu bolsa toparyň taryhyndaky ikinji görkezijidir (birinji orunda Lionel Messi — 77 gol).
Mundan ozal, Luis Suares Urugwaýyň “Nasional”, Braziliýanyň “Gremio”, Ispaniýanyň “Barselona” we “Atletiko”, Anglýanyň “Liwerpul”, Niderlandlaryň “Aýaks” we “Groningen” klublarynda çykyş etdi. Ol Niderlandlaryň çempiony, Ispaniýanyň bäş gezek çempiony bolup, dört gezek milli kubogyny gazandy, şeýle hem bir gezekden Çempionlar ligasynda, UEFA-nyň Superkubogynda we klublar arasynda dünýä çempionatynda ýeňiji boldy.
Urugwaýyň milli ýygyndysynda Suares 143 oýun geçirdi, bu milli toparyň taryhyndaky ikinji görkezijidir (iň köp oýun Diego Godiniň hasabynda — 161). Hüjümçi milli ýygynda 69 gol geçirip we 39 netijeli pas berdi. 2011-nji ýylda Urugwaý ýygyndysynyň düzüminde Amerika kubogynyň ýeňijisi boldy.