Türkmenistanyň diplomatik işgärleriniň güni mynasybetli geçirilen «Magtymguly Pyragynyň parahatçylyk taglymaty we Bitarap Türkmenistanyň diplomatiýasy» atly halkara maslahatda çykyş eden Italiýa Respublikasynyň Türkmenistandaky Adatdan daşary we Doly ygtyýarly Ilçisi Luiji Ferrari Türkmenistanyň diplomatik gullugynyň hünär baýramçylygynyň 15 ýyllyk dabarasyna gatnaşmakdan hoşaldygyny belläp, diplomatiýanyň dürli medeniýetli we syýasy ulgamdaky adamlary birleşdirmek üçin möhüm gural bolup durýandygyny belledi.
Italiýa bilen Türkmenistanyň diplomatik gatnaşyklaryna 32 ýyl dolýandygyny bellän ilçi 10 ýyl mundan ozal Italiýanyň ilçihanasynyň açylandygyny mälim etdi. Şol geçen döwürde köp sanly syýasy, medeni we işewürlik çäreleri guraldy.
Şeýle medeni çäreleriň biriniň 1-nji martda Aşgabatda geçiriljekdigini bellän Luiji Ferrari italýan we türkmen pianinoçylaryň bilelikdäki konsertiniň göz öňünde tutulýandygyny belledi.
Ilçi italýan diliniň hem türkmen ýaşlarynyň arasynda uly meşhurlykdan peýdalanýandygyny belläp, Türkmenistanyň ýokary okuw mekdepleri bilen örän netijeli gatnaşyklaryň saklanýandygyny, 2 sany italýan professorlaryň türkmen uniwersitetlerinde talyplara italýan dilini öwretmäge goldaw berýändigini aýtdy.
Şeýle hem ilçi 6-njy martda Italiýa bilen Türkmenistanyň arasyndaky gatnaşyklary has-da ýygjamlaşdyrjak wakanyň Aşgabat-Milan ugry boýunça ilkinji ýolagçy gatnawlaryň ýola goýuljakdygyny mälim etdi. Bu gönüden-göni gatnawlaryň iki halkyň arasyndaky gatnaşyklary pugtalandyrmak bilen syýahatçylyk we söwdanyň ösdürilmegine goşant goşjakdygyny aýtdy.