Şu gün hormatly Prezidentimiziň başlangyjy bilen Birleşen Milletler Guramasynyň Baş Assambleýasy tarapyndan 2021-nji ýyl – Halkara parahatçylyk we ynanyşmak ýyly diýlip yglan edildi. Şonuň netijesinde, Halkara parahatçylyk we ynanyşmak ýylynyň açylyş dabarasyna bagyşlanan açylyş dabarasy geçirildi.
Türkmenistanyň Daşary işler ministrliginiň Halkara gatnaşyklary institutynda geçirilen dabara ýurdumyzyň hökümet agzalary, paýtagtymyzda daşary ýurtlaryň ilçihanalarynyň ilçileri, halkara guramalaryň wekilleri, ýerli we daşary ýurtly köpçülikleýin habar beriş serişdeleriniň wekilleri gatnaşdy. “Atavatan Türkmenistan” halkara žurnalynyň hem gatnaşan bu açylyş dabarasyna Birleşen Milletler Guramasynyň Baş Assambleýasynyň 75-nji mejlisiniň başlygy Wolkan Bozkyr wideoýüzlenme bilen çykyş etdi.
PARAHATÇYLYK WE YNANYŞMAK – DÖWRÜŇ MÖHÜM GURALYNA ÖWRÜLDI
Dünýäniň ençeme ýurdundan halkara guramalaryň wekilleriniň hem-de daşary ýurtly habarçylaryň onlaýn tertipde gatnaşmagynda geçirilen dabarada wideoýüzlenme bilen çykyş eden Baş Assambleýasynyň 75-nji mejlisiniň başlygy Wolkan Bozkyr parahatçylyk we ynanyşmagyň döwrüň möhüm guralyna öwrülendigini belledi. Ol Türkmenistanyň hökümetine häzirki çylşyrymly döwürde ozalkylardan has köp ähmiýete eýe bolan şeýle başlangyç bilen çykyş edendigi üçin minnetdarlyk bildirdi.
Pandemiýanyň köp sanly kynçylyklary emele getiren döwründe BMG-ä agza ähli milletleriň parahatçylyga we ynanyşmaga öňkülerden hem köp zerurlyk duýýandygyny bellän Bozkyr şu döwürde dünýäde durnukly ösüşi gazanmak ugrunda ähli milletleriň bilelikde tagalla etmeginiň zerurdygyny nygtap geçdi.
BMG-niň Türkmenistandaky hemişelik utgaşdyryjysynyň w.w.ý.ý we ÝUNISEF-iň Türkmenistandaky wekili Kristina Weýgandyň alyp barmagynda geçiriljek dabarada Türkmenistanyň Ministrler Kabinetiniň Başlygynyň Orunbasary, Daşary işler ministri Raşid Meredowyň, Türkmenistanyň Birleşen Milletler Guramasynyň ýanyndaky Hemişelik wekili Aksoltan Ataýewanyň, Ykdysady hyzmatdaşlyk guramasynyň Baş sekretary Hadi Suleýmanpuryň, Garaşsyz Döwletleriň Arkalaşygynyň Ýerine ýetiriji komitetiniň başlygy – Ýerine ýetiriji sekretary Sergeý Lebedewiň, ÝUNESKO-nyň Baş konferensiýasynyň Başlygy Altaý Jengizeriň, Birleşen Milletler Guramasynyň Ženewadaky edarasynyň Baş direktory Tatýana Walowaýanyň, ÝUNESKO-nyň Baş direktorynyň Afrika ýurtlary boýunça orunbasary Firmin Eduard Matokonyň, Ýadro synaglaryny ählumumy gadagan etmek barada Şertnamasy Guramasynyň Ýerine ýetiriji sekretary Lassina Zerbonyň, Goşulyşmazlyk hereketine başlyk edýän Azerbaýjan Respublikasynyň daşary işler ministri Jeýhun Baýramowyň hem-de Birleşen Milletler Guramasynyň we beýleki sebitleýin hem-de halkara guramalaryň, şeýle-de käbir ýurtlaryň wekilleriniň çykyşlary diňlenildi.
Çykyş edenleriň ählisi diýen ýaly bir pikirde jemlendiler. Dünýädäki çylşyrymly döwürde durnukly ösüşiň gazanylmagy, BMG-niň durnukly ösüş maksatlaryna ýetmek babatdaky tagallalary berkitmek üçin parahatçylyga we ynanyşmaga zerurlyk duýulýandygy bellenildi. Şonuň üçin hormatly Prezidentimiziň bu başlangyjy halkara jemgyýetçiliginiň gyzgyn goldawyna eýe boldy.
Dabarada çykyş eden Ykdysady hyzmatdaşlyk guramasynyň Baş sekretary Hadi Suleýmanpur ýolbaşçylyk edýän guramasy bilen Türkmenistanyň arasyndaky hyzmatdaşlygyň ösdürilmegine uly gyzyklanma bildirýändiklerini belledi. Ol Türkmenistanyň sebitde parahatçylygy we howpsuzlygy berkitmekde hem-de ykdysady hyzmatdaşlygy ösdürmekde möhüm orun eýeleýändigini nygtady.
Telekeçilik bilen meşgullanmak isleýän ýaşlaryň we telekeçileriň söýgüli sahypasy-Telekeçilik Sahypasy!
