Meşhur ispan tälimçisi Hospe Gwardiola üçin Angliýanyň “Mançester Siti” topary täze şertnama hödürledi. Bu barada “Nýu Ýork Taýms” gazeti habar berýär.
Täze şertnama 1+1 görnüşinde bolup, şertnamanyň möhleti bir ýyl bolup, ýene-de bir ýyl uzaltmak mümkinçiligi bardyr. Ispan hünärmeniň häzirki şertnamasynyň möhleti 2025-nji ýylyň iýunynda tamamlanýar.
53 ýaşyndaky Gwardiola “Mançester Siti” toparyna 2016/2017-nji ýyldan bäri tälim berip gelýär. Şol döwürde bu topar 6 gezek Angliýanyň çempiony boldy, 2 gezek Angliýanyň kubogyny, 4 gezek Liganyň kubogyny, 3 gezek Angliýanyň Superkubogyny gazandy.
2023-nji ýylda Gwardiolanyň “Mançester Siti” topary bir möwsümde 4 kubogy ýagny, Çempionlar ligasynyň kubogyny, UEFA-nyň Superkubogyny we toparlaryň dünýä çempionatynyň kubogyny hem-de Angliýanyň çempionlyk kubogyny gazandy.
Ispan tälimçi mundan ozal, Ispaniýanyň “Barselona” hem-de Germaniýanyň “Bawariýa” toparlaryna tälim beripdi.
Gwardiola futbolçy hökmünde Ispaniýanyň “Barselona” topary bilen 6 gezek Ispaniýanyň çempiony boldy. 1992-nji ýylda Ispaniýanyň milli ýygyndysy bilen Olimpiýa çempiony boldy.
Gwardiola Halkara futbol federasiýasy tarapyndan 3 gezek “Ýylyň iň gowy tälimçisi” baýragyna mynasyp boldy.