Ildeşimiz Gurban Berdýew Russiýanyň ýokary ligasynda çykyş edýän “Soçi” toparyndaky baş tälimçilik wezipesini tabşyrdy. Bu barada toparyň resmi saýty habar berýär. Toparyň tälimçisi wezipesini wagtlaýynça Dmitriý Hohlow alyp barar.
– “Soçi” futbol topary Gurban Berdiýewe mundan soňky durmuşynda üstünlikler arzuw edýär – diýlip, metbugat beýanatynda bellenilýär.
70 ýaşyndaky tälimçi 2022-nji ýylyň dekabrynda bu topara tälimçi bolupdy. Häzirki wagtda “Soçi” topary Russiýanyň futbol çempionatynda 9-njy orunda barýar. Berdiýewiň tälimçilik eden 5 duşuşygynda topar 2 duşuşykda ýeňiş gazanyp, 3 duşuşykda ýeňildi.
Gurban Berdiýew “Rubin” toparyny 2 gezek Russiýanyň çempiony etdi. Şeýle hem Russiýanyň kubogyny we superkubogyny gazandy. 2015/2016-njy möwsümde Berdiýew “Rostow” topary bilen Russiýanyň wise-çempiony boldy.
Ol 2021-nji ýylda “Kaýrat” topary bilen Gazagystanyň çempionatynda bürünç medala we ýurduň kubogyny gazandy.