Germaniýanyň milli ýygyndysy final duşuşygynda Türkiýäniň milli ýygyndysyny 88:83 hasabynda ýeňip, 1993-nji ýyldan bäri ilkinji gezek Ýewropa çempionatynyň ýeňijisi boldy. Duşuşyk Rigada geçirildi.
Ýeňijileriň düzüminde iň köp utuk toplan basketbolçy Isaak Bonga boldy, ol 20 utuk gazandy. Ikinji orny eýelän Türkiýäniň ýygyndysynda iň netijeli çykyş eden Alperen Şengün bolup, onuň hasabynda 28 utuk boldy.
Üçünji ýer ugrundaky duşuşykda Gresiýanyň ýygyndysy Finlýandiýany 92:89 hasabynda ýeňdi.
Germaniýanyň ýygyndysy ikinji gezek Ýewropa çempionatynyň ýeňijisi boldy. Mundan ozal nemesler 1993-nji ýylda çempion bolan. 2005-nji ýylda kümüş medala, 2022-nji ýylda bolsa bürünç medala mynasyp bolupdylar. Germaniýanyň ýygyndysy häzirki wagtda dünýä çempiony hem bolup durýar.
Türkiýäniň ýygyndysy Ýewropa çempionatynyň kümüş medalyny ikinji gezek gazandy. 2001-nji ýylda hem olar öz ýurdunyň ýerinde geçirilen çempionatda şeýle netijäni görkezmäge başarypdy.
Ýewropa çempionatyny Kipr, Finlýandiýa, Polşa we Latwiýa kabul etdi.