Gazagystanda köpçülikleýin sanjyma başlandy
Gazagystanda koronawirus ýokanjyna garşy köpçülikleýin sanjyma girişildi. Ilkinji tapgyrda Russiýadan alnan “Sputnik V” sanjymy ulanylar. Bu barada köpçülikleýin metbugat gulluklary habar berýär.
Ilatyň käbir toparlaryna – lukmançylyk işgärleri, polisiýa işgärleri, harby işgärler we COVID-19 keseliniň döremek howpy ýokary bolan beýleki hünärleriň wekillerine ilkinji sanjymlar ediler.
15-nji fewraldan soňra ýurduň Karaganda derman önümçilik toplumynda “Sputnik V” sanjymy öndüriler. Fewral-iýul aýlarynda 2 million doza sanjym öndürmek meýilleşdirilýär.
Şeýle hem aprel aýyndan başlap, ýurduň özünde öndürilen “QazCovid-in” ýerli sanjymy edilip başlanar. Häzirki wagtda bu sanjymyň kliniki synaglary tamamlaýjy tapgyrda alnyp barylýar.
***
ALŽIR HEM RUS SANJYMYNY ÖNDÜRMEKÇI
Rus hünärmenleri “Sputnik V” koronawirusa garşy sanjym önümçiliginiň ýola goýulmagyna taýýarlyk görmek üçin Alžire giderler. Bu barada Russiýanyň Alžirdäki ilçisi habar berýär.
Taraplar, Alžirde Russiýanyň “Sputnik V” sanjymyny öndürmekde ikitaraplaýyn hyzmatdaşlygy ýola goýmak maksady bilen iki ýurduň degişli edaralarynyň arasynda hyzmatdaşlyk etmek barada ylalaşdylar. Bu ýurtda rus sanjymyny öndürmek üçin 6-9 aý gerek bolar.
Şeýle hem geçen hepde Alžirde “Sputnik V” sanjymy ulanylyp, köpçülikleýin sanjyma başlandy.
Mundan başga-da, Tunis döwleti hem “Sputnik V” sanjymyny bellige aldy. Sanjymy kliniki synag netijelerine baha bermek esasynda bellige almak işi geçirildi.
Tunis Alžirden we Gwineýadan soňra rus sanjymyny bellige alan 3-nji Afrika ýurdudyr.
Global pandemiýa şertlerinde Saglyk ulgamyna degişli habarlar dünýäniň ähli ýerlerinde iň köp okalýan habarlaryň biridir!
