Birleşen Milletler Guramasynyň Azyk we oba hojalyk guramasynyň Baş direktory Suý Dunýuý Türkmenistana amala aşyran iki günlük resmi saparynyň dowamynda Türkmenistanyň Ministrler Kabinetiniň Başlygynyň orunbasary Taňryguly Atahallyýew bilen duşuşdy. Bu barada guramanyň resmi saýtynda habar berilýär.
Duşuşyga oba hojalyk ministri Çaryýar Çetiýew we daşky gurşawy goramak ministri jenap Çarygeldi Babanyýazov hem gatnaşdylar. Gepleşikler FAO bilen Türkmenistanyň arasyndaky hyzmatdaşlygy berkitmäge hem-de agrosyýasat ulgamlaryny özgertmek, howanyň üýtgemegine garşy göreş we institusional ösüş ýaly bilelikdäki ileri tutulýan ugurlary ösdürmäge gönükdirildi.
Baş direktor FAO-nyň Türkmenistandaky Ýurt boýunça wekilhanasynyň açylmagyna Hökümetiň berýän goldawyny ýokary baha berdi we bu ugurda degişli ylalaşyga gol çekilendigini belledi. Ol bu ädimiň FAO-nyň ýurtda amala aşyrýan işlerini we hyzmatdaşlygyny ep-esli güýçlendirjekdigini nygtady. Şeýle-de duşuşykda oba hojalygy, daşky gurşaw we saglygy goraýyş ulgamlarynda hyzmatdaşlygy giňeltmäge gönükdirilen FAO–Türkmenistan 2026–2030-njy ýyllar üçin Ýurt boýunça maksatnamasynyň taýýarlyk işleri ara alnyp maslahatlaşyldy.
Gepleşikleriň dowamynda Türkmenistanyň sebitdäki öňdebaryjylyk orny, aýratyn-da deňze çykalga bolmadyk ösýän ýurtlaryň bähbitleri ara alnyp maslahatlaşyldy. Baş direktor sebit we ählumumy forumlarda işjeň gatnaşmagy dowam etdirmäge çagyrdy we 2026-njy ýylyň 11-15-nji maýy aralygynda Täjigistanyň Duşanbe şäherinde geçiriljek FAO-nyň Ýewropa boýunça 35-nji sebit ministrler maslahatyna sabyrsyzlyk bilen garaşýandygyny bildirdi.