Eýran Yslam Respublikasynyň Daşary işler ministri Hosein Amir Abdollahiýanyň ýolbaşçylygyndaky wekiliýet Aşgabatda saparda boldy. Eýranly myhman Türkmenistanyň Prezidenti Serdar Berdimuhamedow, türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen duşuşdy.
Eýran ýurdumyzyň söwda-ykdysady hyzmatdaşlygy alyp barýan iň möhüm ýurtlarynyň biridir diýip, döwlet Baştutanymyz aýtdy we bu babatda Ykdysady hyzmatdaşlyk boýunça bilelikdäki türkmen-eýran toparynyň uly ähmiýetini belledi. Toparyň işiniň netijesinde, Türkmenistanda elektroenergetika, ulag ulgamynyň taslamalaryny amala aşyrmak boýunça anyk çäreler ylalaşylandygy bellenildi.
Şeýle hem Eýran Yslam Respublikasynyň Daşary işler ministri Hosein Amir Abdollahiýan bilen Türkmenistanyň daşary işler ministri Raşid Meredowyň duşuşygy boldy.
Duşuşykda syýasy, diplomatik, söwda, ykdysady, medeni we gumanitar ugurlarda ikitaraplaýyn hyzmatdaşlygyň köp sanly meselesi ara alnyp maslahatlaşyldy.
Eýran Yslam Respublikasynyň Daşary işler ministri Hosein Amir Abdollahiýan öz ýany bilen Eýranyň metbugat wekillerine beren beýanatynda Eýran Yslam Respublikasynyň Prezidentiniň Aşgabada saparyna hem taýýarlyk görülýändigini belledi.
Diplomatlar iki ýurduň arasynda energetika, üstaşyr we ulag ugurlaryndaky hyzmatdaşlygy giňeltmegiň ýollaryny, sebit derejesinde suw baýlyklaryny dolandyrmak meselesini ara alyp maslahatlaşdylar. Şeýle hem, Hazaryň ýurtlarynyň arasyndaky hyzmatdaşlygy ara alyp maslahatlaşdylar. Eýran 3-nji Hazar ykdysady forumyny geçirmäge taýýardygyny tassyklady.