Russiýanyň Sankt-Peterburg şäheriniň “Zenit” toparynyň eýranly hüjümçisi Serdar Azmun Germaniýanyň “Baýer” topary bilen şertnama baglanyşdy. Ol şu ýylyň tomsunda “Zenit” topary bilen baglanyşan şertnamasynyň möhletini tamamlap, erkin futbolçy hökmünde “Baýer” toparynda futbol ýoluny dowam etdirer. Germaniýanyň topary eýranly hüjümçi bilen 2027-nji ýyla çenli şertnama baglanyşylandygyny habar berdi.
-“Baýer” toparynyň düzümi örän gowy. Men köpden bäri bu topary yzarlaýaryn. Toparyň oýnundan örän hoşal – diýip, Azmun belleýär. Bu barada “Baýer” toparynyň metbugat gullugy habar berýär. Azmun geljekde Germaniýanyň “Bundesliga” futbol çempionatynda oýnajakdygyny belledi.
Geçen ýyl Azmun bilen Ýeropanyň köp sanly futbol toparlary gyzyklandy. Olaryň hatarynda Fransiýanyň “Lion” hem-de Italiýanyň “Ýuwentus” toparlary bar.
Azmun bilen Germaniýanyň “Baýer” toparynyň arasyndaky şertnama 2022-2023-nji ýylyň möwsüminden güýje girýär we ol 2027-nji ýylyň iýun aýyna çenlidir.
“Baýer” toparynyň sport direktory Simon Rolfes hem Azmun barada oňat pikirlerini beýan etdi. Ol eýranly futbolçynyň hüjümleriniň has şowly bolmagyna uly itergi berjekdigini belledi. Şeýle hem nemes bilermeni Azmunyň eýýäm birnäçe ýyldan bäri Russiýanyň iň köp gol geçiren futbolçylarynyň hatarynda durýandygyny nygtap geçdi.
Azmun “Zenit” toparynyň düzüminde 3 gezek Russiýanyň çempiony boldy. Ol halkara arenasyndaky duşuşyklarda hem özüni oňat görkezdi.
AZMUNYŇ RUSSIÝADAKY FUTBOL DURMUŞY BARADA…
Azmun 27 ýaşynda we 2019-njy ýyldan bäri Russiýanyň Sankt-Peterburg şäheriniň “Zenit” toparynda çykyş edip gelýär. Ol bu toparyň düzüminde 3 gezek Russiýanyň çempiony boldy, ik gezek Superkubogy we bir gezek Russiýanyň kubogyny gazandy. 104 duşuşykda oýnap, 62 gol geçirdi.
Şeýle hem Azmun Russiýada “Rubin” hem-de “Rostow” toparlarynyň düzüminde çykyş etdi. 2019/2020-nji möwsümde Russiýanyň iň köp gol geçiren futbolçysy boldy.
Ol Eýranyň milli ýygyndysy bilen 60 duşuşykda oýnap, 39 gol geçirdi.
Umuman, Serdar Azmun Russiýada 208 duşuşykda oýnap, 85 gezek tapawutlandy. Şeýle hem ol Russiýanyň futbol çempionatynda iň köp gol geçiren daşary ýurtly futbolçylaryň biridir.
Azmunyň futbol ýoluny dowam etdirjek Germaniýanyň “Baýer” topary ýurduň çempionatynda 3-nji orunda durýar. 20 duşuşykda 35 utuk jemledi. Topar bahar paslynda Liga Ýewropa kubogy ugrundaky ýaryşyň 1/8 finalynda duşuşyklaryny dowam etdirýär.