Düýn gije futbol janköýerleriniň uly gyzyklanmasyna eýe bolan “El Klasiko” duşuşygynda “Barselona” topary 3 ýyldna soňra “Real Madrid” toparyny 4:0 hasabynda utmagy başardy.
Täze güýçlenmäge başlanan “Barselona” topary XXI asyrda esasy bäsdeşi “Real Madrid” toparyny 9-njy gezek uly hasap bilen ýeňmegiň hötdesinden geldi.
Hawiniň tälimçiliginde ozalky güýçli “Barselona” bolmak ýolunda ynamly ädimler äden topar myhmançylykda “Realyň” derwezesine jogapsyz 4 pökgi girizdi.
“Barselona” toparynyň düzüminde 29-njy minutda Pýer-Emerik Obameýang, 38-nji minutda Ronald Arauho, 47-nji minutda Ferran Torres we 51-nji minutda ýene-de Pýer-Emerik Obameýang tapawutlandy.
Ispaniýanyň “La Liga” futbol çempionatynyň 29-njy tapgyrynda oýnalan bu duşuşykdan soňra “Real Madrid” toparynyň 66 utugy bolup, birinji orunda barýar. “Barselona” topary bolsa, 54 utuk bilen üçünji orunda durýar.
“Barselona” topary 2019-njy ýylyň 2-nji martyndan soňra ilkinji gezek “Real Madrid” toparynyň “Santiýago Barnabeu” stadionynda ýeňiş gazandy. “Barselona” topary soňky gezek 2015-nji ýylyň 21-nji noýabrynda “Real Madrid” toparyny 4:0 hasabynda ýeňipdi.
Duşuşygyň iň garry futbolçysy bolan Dani Alwes 86-njy minutda duşuşyga girip, “Barselona” toparynyň düzüminde 400-nji duşuşygyna çykdy.
“La Liga” çempionatynda şu wagta çenli iki topary 184-nji gezek duşuşdy. Bu duşuşyklaryň 76-synda “Real Madrid”, 73-sinde “Barselona” ýeňiş gazandy. 35 duşuşyk deňme-deň tamamlandy.
Ähli “El Klasiko” duşuşyklarynda “Real Madrid” toparynyň 100 ýeňşi, “Barselona” toparynyň bolsa, 96 ýeňşi bar. 52 duşuşyk deňme-deň tamamlandy.
Josef Baýdenden Prezident Serdar Berdimuhamedowa gutlag haty