Ekinleri tozanlandyrmakda arylaryň ähmiýeti uludyr. Ynha, ýapon alymlary bu iş üçin robot arylary işläp taýýarladylar.
Aslynda, «dron» arylar babatyndaky ilkinji taslama ABŞ-nyň Garward uniwersitetiniň alymlaryna degişlidir. Olaryň synanyşygy hem üstünlikli tamamlanypdy. Ýakynda bolsa amerikaly kärdeşleriniň göreldesine ýapon alymlary hem eýerip, oba hojalyk ekinlerini tozanlandyrmak üçin robot arylary işläp taýýarladylar.
Bu iş Ýaponiýanyň Milli industrial bilim we tehnologiýa institutynyň alymlaryna degişlidir. Olaryň öndüren robot arylarynyň ini 4 santimetre, agramy bolsa 15 grama ýetýär. Kinniwanja tozanlandyryjylar dron kameralarynyň iş ulgamy boýunça işleýär.
Alymlar arylaryň ösümlikleriň güllerini tozanlandyrmak ukybyny kämil derejä ýetirdiler. Olaryň bu ukybyny göwresiniň üsti böleginde oturdylan kinniwanja tehnologik gurluş amala aşyrýar. Özi hem robot arylaryň ekine asla zyýan bermeýändigine göz ýetirildi.