Afrika yklymynda ýerleşýän Efiopiýa özüniň ilkinji emeli hemrasyny älem giňişligine iberdi. Efiopiýa ilkinji emeli hemrasyny älem giňişligine Hytaýyň kömegi bilen ýollady.
– Bu taslama biziň ýurdumyzyň ösüş ýolundaky taryhy waka boldy – diýip, Efiopiýanyň Premýer-ministriniň orunbasary Demeke Mekonnen gürrüň berdi.
Ýurduň paýtagty Addis-Abebanyň dag etegindäki Entoto kosmos obserwatoriýasyna ýurduň ýolbaşçy düzümi bilen raýatlary ýygnandylar. Olar göni ýaýlymda emeli hemranyň älem giňişligine iberiliş pursatlarynyň şaýady boldular.
Hytaýyň demirgazygyndaky Şansi welaýatynyň Taýýuan kosmodromynda “ÇançŽen-4B” raketa göterijisi arkaly “ETRSS-1” emeli hemrasy kosmosa iberildi.
“ETRSS-1” emeli hemrasy ilkinji nobatda, infrastrukturanyň ösüşi, oba hojalygynyň we tokaý serişdeleriniň ýagdaýy, şeýle hem howa ýadaýy barada nyk maglumatlar almaga mümkinçilik döreder. Emeli hemrany öndürmek üçin 7 million dollar sarp edildi we onuň 6 milliony Hytaý tarapyndan tölendi.
Efiopiýa bu emeli hemrasyny ulanmak arkaly her ýyl 11 million dollar tygşytlamagy meýilleşdirýär.
Efiopiýa 2013-nji ýylyň oktýabrynda Gündogar Afrikanyň iň uly obserwatoriýasyna eýe boldy. Ol Entoto dagynda deňiz derejesinden 3200 metr belentlikde ýerleşýär. Ol hem ýurduň kosmos maksatnamasyny durmuşa geçirmekde ilkinji ädim boldy.