Daşoguz welaýatynda täze, döwrebap Bitaraplyk şäherçesi açyldy

Halkara parahatçylyk we ynanyşmak ýylynda mukaddes Garaşsyzlygymyzyň 34 ýyllyk baýramynyň öňüsyrasynda paýtagtymyzyň demirgazygyndaky senagat zolagynda kuwwatlylygy bir gije-gündizde 100 tonna çüýşe önümlerini öndürmäge niýetlenen täze önümçilik desgasynyň, Ahal welaýatynyň Ak bugdaý etrabynyň Öňaldy geňeşliginde Döwletli mekan obasynyň dabaraly ýagdaýda açylmagy il-ulsumyzyň toý şatlygyny goşalandyrdy. Şu gün — 11-nji sentýabrda Daşoguz welaýatynyň Köneürgenç etrabynyň Täze ýol geňeşliginde täze, döwrebap Bitaraplyk şäherçesiniň hem-de täze awtomobil köprüsiniň açylmagy mynasybetli dabaralar hem şanly senä bagyşlanan toý sowgatlarynyň üstüni ýetirdi.

Döwrebap durmuş düzümlerini özünde jemleýän Bitaraplyk şäherçesiniň açylyş dabarasyna Türkmenistanyň Mejlisiniň Başlygy, jemgyýetçilik guramalarynyň ýolbaşçylarydyr wekilleri, il sylagly ýaşulular, mährem eneler, welaýatyň köp sanly ýaşaýjylary, dürli kärlerde zähmet çekýän ildeşlerimiz gatnaşdy. Açylyş dabarasy hormatly Prezidentimiziň iberen Gutlagynyň okalmagy bilen başlandy. Gutlagda Daşoguz wela­ýa­ty­nyň Köneürgenç etraby­nyň Tä­ze ýol ge­ňeş­li­gin­de şat­lyk-şow­hu­na bes­le­nip, dabara­ly açylýan tä­ze, döw­re­bap Bi­ta­rap­lyk şä­her­çe­siniň ýur­du­my­zyň depgin­li ösüş­le­ri­niň özbo­luş­ly be­ýa­ny bo­lup dur­ýandygy, bu şä­herçäniň  «Döw­let adam üçin­dir!», «Wa­tan di­ňe hal­ky bi­len Wa­tan­dyr! Döwlet di­ňe hal­ky bi­len döw­let­dir!» diýen ynsan­per­wer ýö­rel­ge­le­riň üs­tün­lik­li dur­mu­şa ge­çi­ril­ýän­di­gi­ne aý­dyň şaýat­lyk ed­ýändigi nygtalýar.

Soňra medeniýet we sungat ussatlarynyň ýerine ýetiren şatlyk-şowhunly aýdym-sazlarynyň astynda dabara gatnaşýan ildeşlerimiz täze, döwrebap şäherçede döredilen mümkinçilikler bilen tanyşdylar. Şä­her­çe­de döw­re­bap ýa­şa­ýyş jaýlarynyň 400-si, ge­ňeş­li­giň eda­ra bi­na­sy, hyz­mat­lar öýi, aragatnaşyk bölümi, 420 orun­lyk or­ta mek­dep, 160 orun­lyk ça­ga­lar ba­gy, 200 orun­lyk mede­ni­ýet öýi, sag­lyk öýi, 500 orun­lyk toý me­ka­ny, şeý­le hem önümçi­lik mak­sat­ly hä­zir­ki za­man des­ga­la­ry gu­ruldy. Täze durmuş düzümleriniň gurluşygynyň başdan-aýak ýerli gurluşyk kärhanalary tarapyndan ýerine ýetirilendigi aýratyn bellenilmäge mynasypdyr.

Täze, döwrebap Bitaraplyk şäherçesinde häzirki zaman ýol-ulag, aragatnaşyk, suw, elektrik, gaz üpjünçilik hem-de lagym ulgamlarynyň göz öňünde tutulmagy, giň we yşyklandyryş ulgamy çekilen awtomobil ýollarynyň ugrunda gök zolaklaryň döredilmegi adamlaryň bagtyýar durmuşda ýaşamagy üçin mynasyp şertleriň döredilmegine oýlanyşykly çemeleşilendigini görkezýär.

Watanymyzyň ykdysady we döredijilik kuwwatynyň nyşany bolan täze obadyr şäherçeleriň açylmagy diňe bir halkymyzyň ýaşaýyş-durmuş şertlerini gowulandyrmak bilen çäklenmän, eýsem, goşmaça iş orunlarynyň döredilmegine, täze ilatly ýerleriň mundan beýläk-de ösdürilmegine itergi berýär.