Birleşen Milletler Guramasynyň Türkmenistandaky wekilhanasy özüniň Instagram hasabyndan nädogry maglumatlaryň ölüm howpyna getirip biljekdigini beýan etti. Halkara guramanyň @un_turkmenistan Instagram hasabynda “nädogry maglumat howply we netijede ölüm howpyna getirip biler, esasanam #COVID19 pandemiýasy döwründe. Şonuň üçin säginiň, onlaýn paýlaşýan zatlaryňyz hakda pikirleniň we nädogry maglumatlara garşy göreşiň” diýilýär we bu maglumat Türkmen, Rus we Iňlis dilinde Instagram hasabyny yzarlaýanlaryna ýetirilýär.
“Atavatan Türkmenistan” halkara žurnalynyň www.atavatan-turkmenistan.com saýty hökmünde Birleşen Milletler Guramasynyň Türkmenistandaky wekilhanasynyň bu çagyryşyna goldaw berýäris. Hakykatdan hem, käbir IMO, Instagram ýa-da beýleki jemgiýetçilik torlarynda resmi taýdan tassyklanyp tassyklanmadygy nämälim bolan we/ ýa-da BSGG ýaly halkara saglyk guramalarynyň we beýleki abraýly saglyk edaralarynyň tassyk etmedik maslahatlary paýlaşylýar.
Şol sebäpli diňe bir #COVID19 pandemiýasy bilen baglanşykly däl, eýsem haýsyda bolsa bir maglumaty paýlaşmazdan ozal şol maglumatyň dogrylygyny barlamak we diňe dogrylygy tassyklanyp bolan maglumatlary paýlaşmagy maslahat berýäris. Sebäbi biziň ýagşy niýet bilen paýlaşan maglumatlarymyz eger ýalňyş bolsa, başgalaryna esasan hem ýakynlarymyza zyýan berip biler.
Saglyk habarlarymyz we Peýdaly Maslahatlar habarlarymyz üçin gök ýazylan ýere basyň!