Şu gün UEFA-nyň iň esasy ýaryşy bolan Çempionlar ligasynyň final duşuşygy geçiriler. Türkiýe Respublikasynyň Stambul şäherindäki Olimpiýa stadionynda geçiriljek duşuşykda Angliýanyň “Mançester Siti” topary bilen Italiýanyň “Inter” topary duşuşar.
Angliýanyň “Mançester Siti” topary bu ýaryşda ynamly oýun görkezdi. Iňlis topary finala çenli ähli duşuşyklarda ýeňilmän, güýçli toparlary ýaryşdan çykarmagy başardy.
Angliýanyň “Mançester Siti” topary bilen Italiýanyň “Inter” topary özara 3-nji duşuşygyny geçirer. Ýöne bu iki topar ozal, Ýewropa kubok ýaryşlarynda özara duşuşyk geçirmändi. Mundan ozalky, duşuşyklary ýoldaşlyk oýunlary bolupdy.
Mundan ozal, 2021-nji ýylda finala çykan Angliýanyň “Mançester Siti” topary italýan garşydaşyny ýeňen halatynda, ilkinji gezke bu abraýly kubogy eýelär.
Italiýanyň “Inter” topary bolsa, mundan ozal 3 gezek Çempionlar ligasynyň kubogyny gazandy. Italýan topary 1963-64/nji ýylda “Real Madrid”, 1964/65-nji ýylda “Benfika” we 2009/2010-njy ýylda “Bawariýa” toparyny ýeňip, arzyly kubogyň eýesi bolupdy.
Çempionlar ligasynyň finaly Stambul şäherinde geçiriler. Stambul şäheri 2-nji gezek şeýle abraýly kubogyň final duşuşygynyň geçirilýän ýeri hökmünde saýlandy. Mundan ozal, 2005-nji ýylda final duşuşygyň egçirilip, şonda “Liwerpul” topary 3:0 hasabynda “Milan” toparyndan utulyp gelýändigine garamazdan, hasaby deňläp, ýeňiş gazanmagy başarypdy. Şonda köp sanly janköýerler bu duşuşygy “Stambul gudraty” hökmünde atlandyrypdylar.
Stambuldaky final duşuşygynda polşaly Şimon Marçinýak eminlik eder. Ol 2022-nji ýylda Katarda geçirilen dünýä çempionatynyň final duşuşygynda hem eminlik edipdi.