UEFA-nyň Çempionlar Ligasynyň 3-nji tapgyrynyň çäklerinde “E”, “F”, “G” we “H” toparçalarynda duşuşyklar geçirildi. Bu toparçalardaky duşuşyklar bilen baglanyşykly gyzykly maglumatlar dykgatyňyza ýetirýäris:
- “Barselona” toparynyň ökde goragçysy Žerar Pike 34 ýyl we 260 gün bilen Çempionlar ligasynda gol geçiren iň uly ýaşly futbolçy boldy. Pikeniň bu goly “Barselona” toparyna şu möwsümdäki Çempionlar ligasynda ilkinji ýeňşini gazanmaga mümkinçilik berdi.
- “Bawariýa” topary Çempionlar ligasynda 25 duşuşykdan bäri arasyny üzmän gol geçirip gelýär.
- Ispaniýanyň “Wilýareal” topary Çempionlar ligasynyň toparlaýyn tapgyrynda 2008-nji ýyldan soňra ilkinji ýeňşini gazandy. bu topar soňky gezek 2008-nji ýylda “Olborg” toparyny 6:3 hasabynda utupdy.
- “Zalsburg” topary ähli ýaryşlarda bassyr 25 duşuşykdan bäri ýeňilmän gelýär. 22 duşuşykda ýeňiş gazandy.
- “Çelsi” toparynyň daniýaly goragçysy Аndreas Kristensen toparyň düzüminde resmi duşuşyklarda ilkinji gezek tapawutlandy. Ol 137 duşuşykdan soňra gol geçirmegi başardy.
- “Ýuwentus” topary Russiýanyň futbol toparlary bilen geçiren 9 duşuşygynyň 8-sinde ýeňiş gazandy. Diňe “Zenit” topary bilen 2008/2009-njy ýyldaky Çempionlar ligasynda 0:0 hasabynda deňme-deň oýnady.