Ýewropa sebiti dünýäniň beýleki sebitlerine garanyňda has çalt “gyzýar”. Dünýäde yssy howadan bolup geçýän her üçünji ölüm Ýewropa degişli. Howanyň üýtgemegi bilen baglanyşykly ilatyň saglygyna abanýan howplaryň artmagy sebäpli, BSGG-nıň Ýewropa sebit býurosy howa we saglyk boýunça Panýewropa komissiýasynyň döredilýändigini yglan etdi.
BMG-niň maglumatlaryna görä, bu komissiýa häzirki wagtda adamlaryň durmuşyna gönüden-göni täsir edýän howa krizisi şertlerinde saglygy goraýyş ulgamyna niýetlenen anyk we ykdysady taýdan netijeli çözgütleri işläp düzer. Täze edaranyň ýolbaşçysy hökmünde Islandiýanyň öňki premýer-ministri Katrin Ýakobsdottir bellenildi. Komissiýanyň ylmy geňeşçisi hökmünde Londonyň gigiena we tropiki lukmançylyk mekdebinden professor Endrýu Hein çykyş edýär.
Komissiýanyň düzümine BSGG-nyň Ýewropa sebitinden dürli ýurtlary we halkara guramalary wekilçilik edýän ylmy we syýasy gatlakdan jemi 11 hünärmen girýär.
BSGG saglygy goraýyş pudagynyň howanyň üýtgemegi bilen göreşde giň mümkinçilikleriniň bardygyny belleýär – infrastrukturany döwrebaplaşdyrmakdan (meselem, energiýa taýdan tygşytly hassahanalary gurmak, yssy howa barada irki duýduryş ulgamlaryny döretmek) başlap, zyýanly galyndylary azaltmaga çenli.