Häzirki wagtda Türkmenistan halkara söwda ulgamynda hyzmatdaşlyga jogapkärli çemeleşip, şunuň bilen baglylykda, Bütindünýä Söwda Guramasynyň çäklerinde gatnaşyklara aýratyn ähmiýet berýär. Bu halkara gurama bilen gatnaşyklar barada hasabat Ministrler Kabinetiniň mejlisinde berildi.
Mälim bolşy ýaly, Türkmenistanyň wekiliýeti Dubaý şäherinde Bütindünýä hökümet sammitine gatnaşdy. Sammitiň çäklerinde BSG-niň Baş direktory bilen duşuşyk geçirildi. Onuň barşynda ikitaraplaýyn hyzmatdaşlygyň giň meseleleri ara alnyp maslahatlaşyldy. Türkmenistana goşulyşýan döwlet, ýagny “işjeň synçy” derejesiniň berilmegi bu guramanyň çäklerinde işi işjeňleşdirmäge hem-de geljekde onuň doly hukukly agzasy bolmaga mümkinçilik berýär.
Döwlet Baştutanymyzyň tabşyryklaryny ýerine ýetirmek hem-de ýurdumyzyň häzirki zaman dünýä hojalyk gatnaşyklary ulgamyna üstünlikli goşulyşmagyny üpjün etmek maksady bilen birnäçe teklipler, şol sanda BSG bilen ulgamlaýyn hyzmatdaşlyk üçin Iş meýilnamasyny işläp taýýarlamak, bu gurama doly hukukly agza hökmünde goşulmak boýunça görülýän çäreleri işjeňleşdirmek babatda birnäçe teklipler taýýarlanyldy. Şeýle hem degişli düzüm birligini açmak, BSG boýunça Türkmenistanyň ýörite wekilini bellemek meselelerini öwrenmek, öňümizdäki aýda ýurdumyzyň wekiliýetini hyzmatdaşlyk meselelerini ara alyp maslahatlaşmak üçin Ženewa (Şweýsariýa Konfederasiýasy) şäherine gulluk iş saparyna ibermek teklip edilýär. Ženewada bu guramanyň ştab-kwartirasy ýerleşýär.
Türkmenistan 2020-nji ýylyň iýul aýynda BSG-da synçy derejesine eýe boldy. 2022-nji ýylyň fewralynda BSG-niň Ženewada geçirilen Baş Geňeşiniň nobatdaky mejlisinde biziň ýurdumyz BSG-niň doly agzasy bolmak üçin ýüz tutdy.
Netijede, Türkmenistana Bütindünýä söwda guramasyna goşulyşýan döwlet (“işjeň synçy”) derejesini bermek kararyna gelindi. Bu derejä eýe bolmak, Türkmenistanyň daşary söwdadaky ornuny berkitmäge we ygtybarly we jogapkär hyzmatdaş hökmünde halkara abraýyny ýokarlandyrmaga kömek edýär.