Birleşen Milletler Guramasynyň Baş sekretary Antoniu Guterriş Türkmen döwletiniň täze saýlanan Baştutanyny Serdar Berdimuhamedowy saýlawlarda ynamly gazanan ýeňşi bilen tüýs ýürekden gutlap, oňa bu möhüm we jogapkärli wezipesindäki işinde uly üstünlikleri arzuw etdi. Serdar Berdimuhamedow bolsa Türkmenistanyň Prezidenti wezipesine saýlanmagy mynasybetli mähirli gutlaglary we iň gowy arzuwlary üçin Antoniu Guterrişe tüýs ýürekden minnetdarlyk bildirip, öz gezeginde, Hormatly Arkadagymyz tarapyndan alnyp barlan ugry dowam etdirjekdigini, BMG bilen hyzmatdaşlygy munban beýläk-de giňeltmek babatda ähli tagallalary etjekdigini nygtady.
Şu gün Türkmenistanyň Prezidenti Gurbanguly Berdimuhamedowyň we Birleşen Milletler Guramasynyň Baş sekretary Antoniu Guterrişiň arasynda telefon arkaly söhbetdeşlik boldy.
Milli Liderimiz halkara guramasynyň ýolbaşçysy bilen mähirli salamlaşyp, Merkezi saýlaw topary tarapyndan yglan edilen, 12-nji martda geçirilen Prezident saýlawlarynyň netijelerine laýyklykda, Serdar Berdimuhamedowyň Türkmenistanyň Prezidenti wezipesine saýlanandygyny habar berdi.
Şunda hormatly Prezidentimiz öz işini Türkmenistanyň Milli Geňeşiniň Halk Maslahatynyň Başlygy wezipesinde işjeň dowam etmegi meýilleşdirýändigini belledi.
Döwlet Baştutanymyz mümkinçilikden peýdalanyp, Türkmenistanyň we Birleşen Milletler Guramasynyň arasyndaky hyzmatdaşlygy ösdürmäge berýän uly ünsi hem-de bilelikdäki netijeli işleri üçin, Antoniu Guterrişe çäksiz minnetdarlyk bildirdi. Milli Liderimiz soňky ýyllaryň dowamynda Türkmenistanyň we Birleşen Milletler Guramasynyň giň gerimli ugurlar boýunça netijeli hyzmatdaşlyk edendigini belledi. Şunuň bilen baglylykda, dünýäde parahatçylygy we howpsuzlygy üpjün etmek, durnukly ulag hem-de energetika, ykdysady, durmuş, ynsanperwer we ekologiýa meselelerini çözmek ýaly wajyp ugurlarda hyzmatdaşlygy ösdürmäge möhüm ähmiýet berlendigi nygtaldy.
Hormatly Prezidentimiz Gurbanguly Berdimuhamedow abraýly halkara guramasy we onuň düzümleýin edaralary bilen durnuklylygyň, parahatçylygyň dünýäde durnukly ösüşiň bähbidine mundan beýläk-de ösdüriljekdigine ynam bildirdi.
Birleşen Milletler Guramasynyň Baş sekretary öz nobatynda, milli Liderimizi giň bäsleşik esasynda üstünlikli geçirilen nobatdan daşary Prezident saýlawlary bilen gutlady. Bu saýlawlar Türkmenistanda amala aşyrylýan giň demokratik özgertmeleriň nobatdaky aýdyň subutnamasyna öwrüldi. Antoniu Guterriş şeýle hem hormatly Prezidentimiz Gurbanguly Berdimuhamedowa Türkmenistanyň Prezidenti wezipesinde 15 ýylyň dowamynda Birleşen Milletler Guramasyny goldandygy üçin hoşallyk bildirdi.
Bellenilişi ýaly, şu geçen ýyllarda Türkmenistan bilen BMG-niň arasynda dünýäniň durmuş we ykdysady tarapdan goraglylygyny üpjün etmek hem-de sebitde we tutuş dünýäde ýaşaýyş-durmuş derejesini ýokarlandyrmak babatda düýpli hyzmatdaşlyk gatnaşyklary döredildi. Türkmen döwleti köp ugurly ulgama ygrarly bolmak bilen, Durnukly ösüş maksatlarynyň wezipeleriniň ýerine ýetirilmegine ýardam edýär hem-de dünýä meselelerini çözmekde uly goşandyny goşýar diýip, Antoniu Guterriş aýtdy.
Hormatly Prezidentimiz BMG-niň Baş sekretaryna berk jan saglyk, uzak ömür hem-de ähli üstünlikleriň ýaran bolmagyny arzuw edip, telefony Türkmenistanyň täze saýlanan Prezidenti Serdar Berdimuhamedowa geçirdi.
BMG-niň ýolbaşçysy Türkmen döwletiniň täze saýlanan Baştutanyny saýlawlarda ynamly gazanan ýeňşi bilen tüýs ýürekden gutlap, oňa bu möhüm we jogapkärli wezipesindäki işinde uly üstünlikleri arzuw etdi.
Serdar Berdimuhamedow Türkmenistanyň Prezidenti wezipesine saýlanmagy mynasybetli mähirli gutlaglary we iň gowy arzuwlary üçin Antoniu Guterrişe tüýs ýürekden minnetdarlyk bildirip, öz gezeginde, Hormatly Arkadagymyz tarapyndan alnyp barlan ugry dowam etdirjekdigini, BMG bilen hyzmatdaşlygy munban beýläk-de giňeltmek babatda ähli tagallalary etjekdigini nygtady.
Pursatdan peýdalanyp, Türkmenistanyň täze saýlanan Prezidenti Serdar Berdimuhamedow Garaşsyz, Bitarap Türkmenistanyň mundan beýläk-de ählumumy ösüşi üçin güýç-gaýratyny gaýgyrmajakdygyna hem-de dünýäde parahatçylygy we durnuklylygy pugtalandyrmak işine saldamly goşant goşjakdygyna ynandyryp, BMG-niň Baş sekretary Antoniu Guterrişe berk jan saglygyny we jogapkärli halkara işinde üstünlikleri arzuw etdi.
Türkmenistanyň saýlanan Prezidenti – Serdar Berdimuhamedow