Türkmenistanyň paýtagty Aşgabatda geçirilen Halkara “Gorkut ata” kinofestiwalyna gatnaşan Türkiýäniň Medeniýet we syýahatçylyk ministrliginiň Kino boýunça baş müdiri Birol Güwen, “Atawatan Media” toparyna beren beýanatynda Türkmenistana ilkinji gezek gelendigini uly buýsanç bilen belledi.
Aşgabadyň täsirli we owadan şäherdigini belläp geçen belli türk režissýory Birol Güwen kinonyň güýji barada gürrüň berdi. Birol Güwen, “Gorkut ata” kinofestiwaly bolmadyk bolsa, kino we sungat bolmadyk bolsa, bu ajaýyp ýurt we bu ajaýyp şäher bilen tanyşmak mümkinçiliginiň bolmajakdygy aýtdy we bu festiwalyň täze başlangyçlar hem-de geljekki hyzmatdaşlyklar üçin täze sahypalary açjakdygyny belledi.
Birol Güwen bilelikde çeper filmeri surata düşürmek üçin taslamalarynyň bardygyny we özara gatnaşyklary kino arkaly has-da pugtalandyrmagy meýilleşdirýändiklerini aýtdy.
Türki döwletleriniň umumy gymmatlyklary barada belläp geçen türk režissýory kino hem-de sungat bilen döwletleriň birek-birege has-da ýakynlaşjakdyklaryny nygtady.
Mundan başga-da, festiwalyň çäginde türkmen tomaşaçylara hödürlenýän çeper filmleriň hatarynda orun alan Türkiýäniň “Lukman Sadyk Ahmet” filminde oýnan türk aktýory Renan Bilek hem “Atawatan Media” topary bilen söhbetdeş boldy. Ol hem bu sungat baýramçyly mynasybetli Türkmenistana ilkinji saparyny amala aşyrýandygyny aýtdy.
Aşgabat şäherine gelmekleri bilen ýagan ýagşy bereket hökmünde baha beren türk aktýory “Gorkut ata” festiwaly mynasybetli ajaýyp ýurt bolan Türkmenistany görmek mümkinçiliginden hoşaldygyny aýtdy.
Türk dünýäsiniň şeýle ajaýyp sungat baýramçylygynda didarlaşmagynyň ähmiýetiniň uludygyny bellän Renan Bilek türkmen halkynyň myhmansöýerligi üçin öz hoşallygyny bildirdi.