Şu ýylyň 8-nji aprelinde Belarus ugry boýunça ýörite uçar gatnawyň amala aşyrylmagy meýilleşdirilýär. “Atavatan Türkmenistan” halkara žurnalynyň www.atavatan-turkmenistan.com saýtynda bar bolan maglumatlara görä, Minsk-Türkmenbaşy ugry boýunça amala aşyryljak bu ýörite gatnaw “Türkmenistan” awiakompaniýasy tarapyndan ýerine ýetiriler. Bu gatnawdan Belarusda okap ýören talyplar we beýleki raýatlarymyz peýdalanar.
Mälim bolşy ýaly, “Türkmenistan” awiakompaniýasy tarapyndan Aşgabat-Moskwa ugry boýunça soňky 1 aýyň dowamynda birnäçe gatnawlar amala aşyryldy. Bu gatnawlar 9-njy martda, 14-nji martda, 18-nji martda we 25-nji martda ýerine ýetirilipdi. Saýtymyza şu gün ýerleşdirilen habarymyza görä, şu ýylyň 8-nji aprelinde Aşgabat-Moskwa ugry boýunça ýörite gatnawyň amala aşyrylmagy meýilleşdirilýär.
Şeýle hem Türkiýäniň “Türkhowaýollary” awiakompaniýasy hem 9-njy martda Stambul-Aşgabat-Stambul ugry boýunça ýörite gatnawy amala aşyryp, 14-nji martda bolsa Stambul-Türkmenbaşy-Stambul ugry boýunça uçuşyny ýerine ýetiripdi. Bellemeli zat, Türkiýäniň “Türkhowaýollary” awiakompaniýasy şu ýylyň 8-nji aprelinde ýörite uçar gatnawyny meýilleşdirýär.
