Ýylyň ahyrynda dünýäniň öňdebaryjy habar agentlikleriniň işi has hem köpelýär. Olary başagaý edýän işleriň biri hem ýylyň öňe çykanlarynyň arasyndan iň gowularyny saýlamakdyr.
Ynha, BBC hem beýleki bäsdeşlerinden kem galman, 2020-nji ýylyň iň gowy türgenlerini yglan etdi. Agentlige görä, ýylyň türgeni «Formula 1»-iň «Mersedes» toparynyň sürüjisi Lýuis Hemiltondyr.
BBC-niň sanawynyň ikinji ornunda «Liwerpulyň» futbolçysy Jordan Henderson bar. Üçünji orny bolsa Holli Doýl eýeleýär.
Ýakynda Lýuis Hemilton «Formula 1»-iň öz tarapyndan hem «2020-nji ýylyň iň gowy sürüjisi» diýlip yglan edilipdi.
Geçen möwsümde britaniýaly 35 ýaşly sürüji germaniýaly Mihael Şumaheriň rekordyny gaýtalap, ýedinji gezek «Formula 1»-iň çempiony bolmagy başardy. Şeýle hem ol möwsümdäki tapgyrlaryň dowamynda ozal Şumahere degişli bolan ýeňiş rekordyny täzeledi. Has takygy, Hemilton indi 92 ýeňiş bilen ýeňijileriň münberiniň iň ýokarky basgançagynda.
Sungat we medeniýet ulgamyna degişli täzelikler medeniýet sahypamyza ýerleşdirilendir!
