Mukaddes Garaşsyzlygymyzyň 34 ýyllyk şanly toýunyň öňüsyrasynda Ahal welaýatynyň Bäherden etrabynyň Bamy geňeşliginde täze, döwrebap çagalar bakja-bagynyň kaşaň binasy dabaraly açylyp ulanmaga berildi. Welaýatdaky döwrebap bilim-terbiýeçilik ojaklarynyň üstüni ýetiren täze çagalar bagy hormatly Prezidentimiziň bagtyýar körpelerdir bilim işgärlerine, etrabyň ähli ýaşaýjylaryna ajaýyp toý sowgady boldy.
Dabara gatnaşyjylar 320 orunlyk döwrebap çagalar bakja-bagynyň otaglaryna we esasy binanyň daşyndaky meýdançalara aýlanyp gördüler. Iki gatdan ybarat bolan kaşaň binanyň gurluşygyny «Iki çynar» hususy kärhanasynyň ezber hünärmenleri ýokary hil derejesinde ýerine ýetirdiler. Ol ýerde körpeleriň döwrebap derejede terbiýelenmegi, ilkinji bilim sowadyny öwrenmegi ugrunda ähli şertlerdir mümkinçilikler göz öňünde tutulypdyr.
Körpeleriň ýaş aýratynlygyna görä bilim-terbiýe almagy üçin otaglaryň enjamlaşdyrylyşyna aýratyn ähmiýet berlipdir. Kompýuter, aýdym-saz, beden maşklary otaglarynyň enjamlaşdyrylyşy has-da ünsi çekijidir. Bu ýerde bilim işgärlerine körpelere dilleri öwretmek we olary watansöýüjilik ruhunda terbiýelemek, döredijilikli zähmet çekmek babatynda ähli amatlyklar bar.