Özbegistanyň paýtagty Daşkent şäherinde Aziýanyň Olimpiýa Geňeşiniň (AOG) 46-njy Baş Assambleýasy geçirildi. Türkmenistanyň wekiliýetiniň hem gatnaşan bu mejlisinde guramaçylyk meselelerine garaldy.
Aziýa yklymynyň iri sport guramasy bolan Aziýanyň Olimpiýa Geňeşiniň täze ýolbaşçysyny saýlamak boýunça çäre guraldy.
Saýlawlaryň dowamynda gatnaşyjylar Milli olimpiýa komitetleriniň assosiasiýasynyň (ANOC) başlygynyň birinji orunbasary, Katar Döwletiniň Olimpiýa Komitetiniň prezidenti Şeýh Joaan bin Hamad Al Taniniň dalaşgärligi biragyzdan makullandy.
Daşkent şäherinde geçirilýän Aziýanyň Olimpiýa Geňeşiniň (AOG) 46-njy Baş Assambleýasynyň işine Özbegistanyň Prezidenti Şawkat Mirziýoýew hem gatnaşdy. Bu mejlisiň işine gatnaşan myhmanlaryň hatarynda – Bütindünýä antidoping agentliginiň prezidenti Witold Banka, Halkara gimnastika federasiýasynyň prezidenti Morinari Watanabe, Halkara agyr atletika federasiýasynyň prezidenti Muhammad Jalud, “World Boxing” guramasynyň prezidenti Gennadiý Golowkin, Halkara otuň üstünde oýnalýan hokkeý federasiýasynyň prezidenti Muhammad Taýýab Ikram, Aziýa paralimpiýa komitetiniň prezidenti Majidd Raşid, Halkara sambo federasiýasynyň prezidenti Wasiliý Şestakow, Milli olimpiýa komitetleri assosiasiýasynyň baş sekretary Gunilla Lindberg, şeýle-de Afrika olimpiýa komitetleri assosiasiýasynyň prezidenti Mustafa Berraf, şol sanda ABŞ-nyň Prezidentiniň ýörite wekili Paolo Zampolli, Russiýa Federasiýasynyň sport ministri Mihail Degtýarew, Saud Arabystany Patyşalygynyň sport ministri Abdulaziz bin Turki Al Saud, Katar Döwletiniň ýaşlar we sport işleri boýunça ministri Şeýh Hamad bin Halifa Al Tanini we başgalar bar.