“Azerbaijan Airlines” awiakompaniýasynyň raýat uçarynyň heläkçilige uçramagy sebäpli Azerbaýjanyň Türkmenistandaky ilçihanasynda hatyra kitaby açyldy.
Türkmenistanyň daşary işler ministriniň orunbasary Serdar Muhammetdurdyýew Azerbaýjanyň Türkmenistandaky ilçihanasyna baryp, Azerbaýjanda 26-njy dekabryň matam güni hökmünde yglan edilmegi sebäpli çuňňur gynanjyny bildirdi hem-de hatyra kitabyna ýazgy galdyrdy.
Azerbaýjanyň “Azertag” habarlar gullugynyň habar bermegine görä, Türkmenistanyň daşary işler ministriniň orunbasary Azerbaýjanyň Türkmenistandaky ilçi Gismet Gozalowa “AZAL” awiakompaniýasynyň raýat uçarynyň heläkçilige uçramagy sebäpli türkmen tarapynyň çuňňur gynançyny bildirdi.
Şeýle hem ol doganlyk azerbaýjan halkyna şu agyr pursatda goldaw sözlerini beýan etdi.
Azerbaýjanyň Türkmenistandaky ilçihanasynda açylan hatyra kitabyna Türkiýäniň Aşgabatdaky ilçisi Ahmet Demirok, Russiýanyň Aşgabatdaky ilçisi Iwan Wolynkin, ABŞ-nyň Aşgabatdaky ilçisi Elizabet Rud we beýleki daşary ýurtlaryň diplomatik wekilleri uçak heläkçiligi sebäpli çuňňur gynançlaryny beýan etdiler.