Awstriýanyň täze kansleri Karl Nehammer kasam kabul edip, täze wezipesine girişdi. Ol bu ýokary döwlet wezipesinde Aleksandr Şallenbergiň ýerine geçdi. Aleksandr Şallenberg bolsa, ýurduň daşary işler ministri wezipesini dowam etdirer.
Täze hökümetiň ilkinji wezipeleriniň biri hem koronawirus ýokanjyna garşy göreşmek bolar. Resmi dabarada Awstriýanyň Prezidenti Aleksandr Wan der Bellen koronawirus ýokanjyna garşy göreşmek wezipesiniň öňdäki orunda durýandygyny belläp, muňa şu dabara gatnaşýanlaryň ählisiniň hem agyz-burun örtügini dakynýandygynyň hem subutnama bolup durýandygyny belledi. Prezident Wan der Bellen bilelikde pandemiýa garşy barlyşyksyz alnyp baryljak göreşiň möhümdigini aýtdy.
Kansler Karl Nehammer dabarada eden çykyşynda: “Kansler wezipesine çynlakaý we hormat bilen çemeleşerin, sebäbi biziň etmeli ajaýyp işimiz bar. Koronawirus adamlar üçin agyr ýük boldy” diýip belledi.
Awstriýanyň ozalky kansleri Sebastýen Kursuň wezipesinden meýletin çekilmegi bilen ýurtda täze kansleri bellemek boýunça degişli işler geçirildi. Gysga wagtlygyna Aleksandr Şallenberg hökümetiň başyna geçdi.
Soňra bu wezipä Karl Nehammer bellendi. Karl Nehammer 2017-nji ýyldan bäri Awstriýanyň 5-nji kansleri boldy.