Mälim bolşy ýaly, Türkmenbaşy şäheriniň halkara deňiz portunda Merkezi Aziýa ýurtlarynyň milli önümleriniň halkara sergisi geçirildi. Oňa hormatly Prezidentimiz Gurbanguly Berdimuhamedow hem-de belent mertebeli myhmanlar — Gazagystan Respublikasynyň, Gyrgyz Respublikasynyň, Täjigistan Respublikasynyň we Özbegistan Respublikasynyň Prezidentleri sebitiň ýurtlarynyň milli önümleriniň halkara sergisine baryp gördüler. Prezidentler Merkezi Aziýanyň döwlet Baştutanlarynyň konsultatiw duşuşygyna gatnaşmak üçin Türkmenistana gelipdiler.
Türkmenbaşy şäheriniň Halkara deňiz porty biziň döwletimiziň we goňşy ýurtlaryň ykdysady üstünlikleri babatda ähmiýetli wakanyň geçirilýän ýerine öwrüldi.
Umumy meýdany 2090 inedördül metr bolan giňişlikde Türkmenistanyň, Gazagystanyň, Gyrgyzystanyň, Täjigistanyň we Özbegistanyň esasy ministrlikleriniň, pudaklaýyn dolandyryş edaralarynyň, guramalarynyň, işewür düzümleriniň sergileri ýerleşdirildi.
Görkezilýän diwarlyklar milli ykdysadyýetleriň esasy pudaklaryny ösdürmekde, şol sanda ýangyç-energetika toplumynda, gurluşyk, oba hojalyk, ulag we logistika, awtomobil gurluşyk, dokma we azyk senagaty ulgamlarynda Merkezi Aziýa ýurtlarynyň gazanan üstünliklerini beýan etdi.
TÜRKMEN KOFESINE ULY GYZYKLANMA
Şol diwarlyklaryň arasynda Türkmenistanda öndürilip, daşary ýurt bazaryna ekesport edilýän “Markow” kofeleri hem köpleriň ünsüni çekdi. 4 aý mundan ozal, türkmen telekeçiler tarapyndan döredilen önümçilik desgasynda kofe medeniýetine degişli dürli hilli kofeler öndürilýär.
Daşary ýurtlardan – Indoneziýa, Keniýa, Efiopiýa, Braziliýa ýaly ýurtlardan getirilen çig malyň döwrebap tehnologiýalar bilen gaýtadna işlenilip, daşary ýurt bazarynda bäsdeşlik ukyby ýokary bolan dürli hilli kofeler taýýarlanýar. Olary eýýäm Russiýa hem-de Owganystana satyp başladylar.
Merkezi Aziýa ýurtlarynyň milli önümleriniň halkara sergisi türkmen önüm öndürijiler üçin netijeli boldy. Kofe öndürýän türkmen telekeçisi Gazagystan Respublikasynyň wekilleri bilen gepleşikler geçirip, kofe eksporty babatda ylalaşyga geldi.
BIRŽA SÖWDALARY: 113 GELEŞIK
Şeýle hem serginin çäklerinde birža söwdalary geçirildi, oňa ýurdumyzyň önümleri çykaryldy. Türkmenistanyň Döwlet haryt-çig mal biržasy tarapyndan geçirilen söwdalarda, Beýik Britaniýanyň, Birleşen Arap Emirlikleriniň, Germaniýanyň, Russiýanyň, Türkiýäniň kompaniýalarynyň wekilleri, Gonkongyň, Owganystanyň, Özbegistanyň, Gyrgyzystanyň we beýlekileriň işewürleri bäsleşdiler.
TDHÇB-de geçirilen birža amallarynyň arasynda nebithimiýa we gurluşyk önümçiliginiň önümleriniň, Diýarymyzda öndürilýän ýeňil senagatyň harytlarynyň, haly önümleriniň söwdalary boldy. 113 geleşikleriň umumy bahasy ABŞ-nyň 108,9 million dollaryna barabar we 3,6 million manada deň boldy.