«Awaza» milli syýahatçylyk zolagynda Gurluşyk we senagat toplumynyň işgärleriniň güni mynasybetli «Türkmenistanyň gurluşyk, senagat, himiýa, energetika pudaklarynyň ösüşi» atly halkara serginiň we maslahaty (CIET 2025) öz işine başlady.
Bu çäre ýylyň esasy işewür wakalarynyň biri bolup, 2025-nji ýylyň 3–4-nji noýabry aralygynda geçirilýär. Forum Türkmenistanyň hem-de daşary ýurtlaryň ykdysadyýetiň öňdebaryjy ugurlarynda işleýän wekillerini birleşdirýär.
“CIET 2025” halkara hyzmatdaşlygy pugtalandyrmaga, gurluşyk, senagat we energetika ugurlaryna innowasiýalary hem-de maýa goýumlary çekmäge, döwlet edaralary, maliýe institutlary we hususy kompaniýalar arasynda özara bähbitli hyzmatdaşlygy ösdürmäge gönükdirilendir.
Çäräniň guramaçylary bolup Gurluşyk we binagärlik ministrligi, Energetika ministrligi, Senagat we gurluşyk önümçiligi ministrligi, “Türkmenhimiýa” döwlet konserni, Awtomobil ýollarynyň gurluşygyny dolandyrmak boýunça döwlet agentligi, şeýle hem Türkmenistanyň Söwda-senagat edarasy bilen bilelikde Aşgabat şäheriniň häkimligi çykyş edýärler.
Forumyň maksady gurluşyk we energetika ugurlarynda sebit hyzmatdaşlygyny güýçlendirmek, senagat kuwwatyny ösdürmek, erkin senagat zonalaryny döretmek we döwrebap tehnologiýalary ornaşdyrmak boýunça tejribe alyşmakdyr.
Maslahatyň çäginde gurluşyk, senagat we energetika ulgamlarynyň ösüşi, şeýle hem jemagat hojalygy baradaky meseleler ara alnyp maslahatlaşylar. Aýratynam, “Arkadag” akylly şäheriniň gurluşygynyň ikinji tapgyrynda durmuşa geçiriljek täze infrastruktura we maýa goýum taslamalaryna – lukmançylyk we gaýtadan işleýiş klasterleriniň döredilmegine aýratyn üns berilýär.
“CIET 2025”-niň işewür maksatnamasy diňe sergini we plenar mejlisleri däl-de, eýsem seminarlary, tegelek stollary we mowzuklaýyn panel maslahatlaryny hem öz içine alýar.
Gatnaşyjylar senagat inženerçiligi, sanly söwda, infrastruktura dolandyryşy we karz beriş ugurlary boýunça döwrebap tejribeleri ara alyp maslahatlaşarlar.
Şeýle hem ähtnamalara we şertnamalara gol çekmek, täze senagat desgalaryna iş saparlary guramak meýilleşdirilýär.
Bu ýylky forumda döwlet dolandyryş edaralarynyň, pudaklaýyn agentlikleriň, birleşikleriň we birleşmeleriň, ylmy-taslama institutlarynyň, halkara kompaniýalaryň hem-de ýokary okuw jaýlarynyň wekilleriniň gatnaşmagynda rekord sany gatnaşyjy ýygnandy.