Şu gün Birleşen Milletler Guramasynyň Aşgabatdaky wekilhanasynda 8-nji noýabrda paýtagtymyz Aşgabatda geçiriljek Merkezi Aziýada raýatsyzlygyň soňuna çykmak boýunça ministerler derejesindäki sebitleýin maslahata bagyşlanan brifing geçirildi. Oňa “Ata Watan Media” topary hem gatnaşdy.
“Merkezi Aziýada raýatsyzlygyň soňuna çykmak” atly brifinge ýurdumyzdaky daşary ýurtlaryň we ýerli köpçülikleýin habar beriş serişdeleriniň wekilleri gatnaşdy.
Media brifinginde BMG-niň Bosgunlaryň işi baradaky Ýokary Komissarynyň Merkezi Aziýa boýunça hukuk meseleleri babatda uly geňeşçisi Rano Saýdumarowa, BMG-niň Bosgunlaryň işi baradaky Ýokary Komissarynyň Merkezi Aziýa boýunça hukuk meseleleri babatda geňeşçisi Balžan Oşakbaýewa, BMG-niň Bosgunlaryň işi baradaky Ýokary Komissarynyň Merkezi Aziýa boýunça halkara gatnaşyklary boýunça geňeşçisi Mariko Holl hem-de BMG-niň Bosgunlaryň işi baradaky Ýokary Komissarynyň Merkezi Aziýa boýunça halkara gatnaşyklary boýunça uly kömekçisi Aýýa Siýaz çykyş etdiler.
Çykyşlarda Merkezi Aziýada soňky 10 ýylyň dowamynda, hususan-da Türkmenistanda raýatsyzlygyň soňuna çykmak boýunça uly ösüşleriň gazanylandygy bellenildi.
Dünýäde raýatlygy bolmadyk hem-de raýatlygy belli däl şahslaryň sanynyň 4,4 milliona barabardygy bellenilip geçildi. Bu ugurda dürli maksatnamalaryň kabul edilendigi aýdyldy.
Ratasyzlygyň soňuna çykmak üçin 2014-nji ýylyň 4-nji noýabrynda BMG-niň Baş Assambleýasy tarapyndan 10 ýyllyk “I Belong” kampaniýasy ýola goýuldy. Bu kampaniýanyň maksady raýatsyzlyk ýaly meseleleriň ýüze çykmagynyň öňüni almakdan ybaratdyr.
Türkmenistan bu kampaniýa ilkinjileriň hatarynda gatnaşyp, raýatsyzlygyň soňuna çykmakda dünýäde öňdebaryjy ýurt bolup, şeýle hem Merkezi Aziýada şu ýyl badalga berlen Raýatsyzlygyň soňuna çykmak boýunça täze Global Alýans başlangyjyna goşlan ilkinji ýurtdyr.