Türkmenistanyň Saglygy goraýyş we derman senagaty ministrliginiň Döwlet arassaçylyk we keselleriň ýaýramagyna garşy göreşmek gullugynyň Aşgabat we Arkadag şäherleriniň Arassaçylyk we keselleriň ýaýramagyna garşy göreşmek gulluklarynyň barlaghanalaryna hil ulgamynyň laýyklyk güwänamasy berildi. Ýakynda Jemgyýetçilik saglygy we iýmit merkezi hem şeýle güwänama mynasyp bolupdy. Munuň özi ýurdumyzyň saglygy goraýyş ulgamynyň degişli düzümlerinde alnyp barylýan işleriň ýokary halkara görkezijilere doly laýyk gelýändigine şaýatlyk edýär.
Berlen güwänamalar degişli düzümlerdäki işleriň TDS ISO 9001 standartynyň bellenen talaplaryna laýyk gelýändigini tassyklaýar. ISO 9001 dünýäde hili dolandyrmak boýunça ykrar edilen standart bolup, ähli ölçeglerdäki edaralara, pudaklara işlerini kämilleşdirmäge, bildirilýän talaplary ýerine ýetirmäge, hil boýunça ygrarlylygyny görkezmäge ýardam edýär. Bu standartyň işe ornaşdyrylmagy arassaçylyk gulluklarynda işleriň netijeli alnyp barylýandygyny, hünärmenleriň öz işlerini ýokary derejede amala aşyrýandygyny, hyzmatlaryň gyşarnyksyz berjaý edilýändigini görkezýär.
Hil ulgamynyň laýyklyk güwänamasyna mynasyp bolan beýleki bir düzümiň — Döwlet arassaçylyk we keselleriň ýaýramagyna garşy göreşmek gullugynyň Arkadag şäheriniň Arassaçylyk we keselleriň ýaýramagyna garşy göreşmek gullugynyň işiniň maksady sanitariýa-epidemiologiýa we gigiýena kadalaryny, daş-töweregi sagdynlaşdyrmaga gönükdirilen arassaçylyk-gigiýena talaplaryny, ýokanç we beýleki keselleriň öňüni alyş çärelerini işläp taýýarlamakdan, iýmit hem iýmitlenmegi, daşky gurşawyň adam saglygyna ýetirýän täsirini, ýokanç keselleriň aýratynlyklaryny öwrenmekden ybaratdyr.
Gullugyň iýmit barlaghanalarynyň akkreditasiýalaşdyrylmagy hem bu ugurda alnyp barylýan işleriň halkara derejede ykrar edilýändigini tassyklaýar. Hil ulgamynyň laýyklyk güwänamasynyň berilmegi bolsa mundan beýläk-de bu ýerde iýmit önümleriniň howpsuzlygyna we hiline döwlet gözegçiliginiň, şol sanda barlaghana barlaglarynyň halkara standartlara laýyklykda amala aşyrylmagyny üpjün etmäge mümkinçilik berýär.