Türkmenistan futbol klublarynyň AFK-nyň ýaryşlaryndaky üstünlikli çykyşlary bilen soňky üç ýylyň rekordyny täzeledi. Gürrüň AFK-nyň klublaýyn reýtingi barada barýar. Hususan-da, «Arkadag» toparynyň AFK-nyň Çagyryş ligasyndaky goşa ýeňşinden soň, Türkmenistana şu möwsümde berlen utuklar 3,450-ä (üç bitin müňden dört ýüz elli) çykdy. Munuň özi 2021-nji ýyldan bäri iň ýokary netijedir.
Mundan üç ýyl ozal yklym ýaryşlarynda 3,125 utuk toplan bilen ýurdumyz 2022-nji ýyly 2,640 utuk bilen jemledi. Geçen ýylda bolsa türkmen toparlarynyň yklym ýaryşlaryndaky çykyşlaryna 3,078 utuk berildi.
Ýeri gelende aýtsak, soňky 8 möwsümiň rekordy 2018-nji ýyla degişlidir. Şol ýyl «Altyn Asyryň» AFK-nyň kubogynyň finalyna çenli baryp ýetmegi biziň ýurdumyza 7,583 utuk gazandyrdy. Türkmenistan 2019-njy ýyly bolsa 5,267 utuk bilen jemledi.
AFK «Arkadag» toparynyň düýnki ýeňşi üçin Türkmenistana ýene 0,750 utuk goşdy. Şeýlelikde, biziň ýurdumyz 8 ýylyň dowamynda ahyrsoňy 20 utukdan geçdi. Häzirki yklymyň klublaýyn reýtinginde Türkmenistanyň 20,211 utugy bar.
Reýtingiň utuklary bir möwsümden soňraky yklym ýaryşyna (mysal üçin, häzirki reýting 2026/27-nji ýyllaryň möwsümine) täsirini ýetirýär. Häzir reýtingiň 20-nji ornuny eýeleýän Türkmenistan möwsümi şu orunda tamamlasa, ýene bir möwsümden soň hem AFK-nyň ikinji derejeli Çempionlar ligasynyň saýlama tapgyryna bir, Çagyryş ligasynyň toparçalaýyn tapgyryna hem bir topar ýollap biler. Türkmenistan AFK-nyň ikinji derejeli Çempionlar ligasyna iki topar ýollap bilmek üçin azyndan 18-nji orna göterilmeli bolar.
«Arkadag» toparynyň AFK-nyň Çagyryş ligasyndaky garşydaşlaryndan Gyrgyzystan («Abdyş-Ata») 23-nji, Kuweýt («Al-Arabi») 25, Maldiwler («Maziýa») 31-nji orunda. Eger «Arkadag» topary 1-nji noýabrda «Al-Arabi» bilen geçiriljek duşuşykda hem ýeňiş ýa-da utuk gazanyp bilse, ýurdumyzyň reýting utuklarynda ýene öňegidişlik bolar.