AFK Çempionlar ligasy–2-niň toparçalaýyn tapgyryny üstünlikli geçiren «Arkadag» futbol topary 1/16 finalyň oýunlaryna taýýarlanýar. Günbatar zolagyndaky toparynda ikinji orny eýelän Türkmenistanyň häzirki çempiony düzgünnama laýyklykda paralel toparlaryň ýeňijileriniň biri bilen duşuşar.
Türkmen toparynyň ähtimal garşydaşlarynyň sanawynda üç sany abraýly klub bar: BAE-niň «Al-Wasl» kluby, Iordaniýanyň «Al-Husseýn» kluby hem-de Saud Arabystanynyň «Al-Nasr» kluby.
Anyk garşydaşy 30-njy dekabrda geçiriljek resmi bije çekişligiň netijesinde belli bolar.
Ýatladyp geçsek, «Arkadag» öz taryhynda ilkinji gezek halkara ýaryşyň pleý-off tapgyryna çykmagy başardy. Munuň çözgüdi toparçalaýyn tapgyryň soňky turunda Bahreýniň «Al-Haldiýa» toparyndan 1:0 hasaby bilen gazanylan ýeňiş boldy.