Şu gün Halkara «Türkmen alabaý itleri» assosiasiýasynyň toplumynda Türkmen alabaýynyň baýramy mynasybetli esasy çäreler ýaýbaňlandyryldy. Dabaraly çäreleriň çäklerinde «Ýylyň türkmen edermen alabaýy» atly halkara bäsleşigiň netijeleri-de yglan edildi. Bu barada Halkara habarlar merkezi habar berdi.
Ýurdumyzda her ýylyň oktýabr aýynyň soňky ýekşenbesinde Türkmen alabaýynyň baýramy bellenýär. Bu baýramçylyk 2021-nji ýyldan bäri uly şatlyk-şowhuna beslenip geçirilýär.
Halkara «Türkmen alabaý itleri» assosiasiýasynyň toplumynda geçirilen dabaralara hökümet agzalary, ilçiler we köp sanly myhmanlar gatnaşdy.
Türkmenistanyň Prezidentiniň gol çeken degişli resminamasyna laýyklykda, «Ýylyň türkmen edermen alabaýy» atly halkara bäsleşiginiň jemi jemlendi. Onda 2019-njy ýylda doglan Akguş atly alabaý ýeňiji boldy. Onuň eýesi Aşgabat şäheriniň ýaşaýjysy Resul Kerimowdyr.
Eminler toparynyň başlygy, Türkmenistanyň halk suratkeşi Saragt Babaýew toparyň çözgüdini yglan edensoň, halkara bäsleşigiň ýeňijisine Türkmenistanyň Prezidentiniň Baş baýragy — awtoulagyň açary, ýörite medal, göçme kubok we diplom gowşuryldy.