Türkmen halkynyň Milli Lideriniň görkezmesi boýunça, Arkadag şäherinde Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy bilen ýurdumyzyň “Sport ýyldyzy” we “Aga gurluşyk” hususy kärhanalarynyň arasynda durmuş maksatly binalary gurmak we ozal bar bolanlaryny döwrebaplaşdyrmak boýunça ikitaraplaýyn şertnamalara gol çekmek dabarasy boldy.
Arkadag şäherinde gazanylan ylalaşyklara laýyklykda, “Aga gurluşyk” hususy kärhanasy Azerbaýjan Respublikasynyň Fizuli şäherinde gurulmagy meýilleşdirilýän metjidiň taslamasyny taýýarlamak we ony gurmak işlerini ýerine ýetirer.
Munuň özi haýyr-sahawat gaznasynyň alyp barýan ynsanperwerlikli işleriniň geriminiň barha giňelýändiginiň aýdyň nyşanyna öwrüldi.
Mälim bolşy ýaly, Hazar deňziniň kenaryndaky “Awaza” milli syýahatçylyk zolagynda ilkinji gezek «Türkmenistan-Özbegistan-Azerbaýjan» üçtaraplaýyn duşuşygy geçirilipdi. Şol duşuşykda Azerbaýjan Respublikasynyň Prezidenti Türkmenistan tarapyndan Azerbaýjanyň Fizuli şäherinde metjit guruljakdygyny habar berip, munuň Türkmenistanyň Azerbaýjana özboluşly sowgady boljakdygyny aýtdypdy.