ABŞ-nyň saýlanan Prezidenti Donald Trampyň wezipesini girişmek dabarasy üçin Waşington şäherinde ähli taýýarlyklar tamamlandy. Donald Tramp we onuň wise-prezidenti Jeýms Wens 20-nji ýanwarda wezipesine girişer.
ABŞ-nyň Prezidentiniň wezipesine girişmek dabarasy Kongressiň binasynda geçiriler. Waşingtonda howanyň 11 gradus sowuk bolandygy üçin dabarany Kongressiň 600 adamlyk Rotondo atly merkezi zalynda geçirmek göz öňünde tutuldy.
Soňky gezek 1985-nji ýylyň 20-nji ýanwarynda ýurduň 40-njy Prezidenti Ronald Reýgan özüniň prezidentliginiň kinji möhleti üçin şu zalda kasam kabul edipdi.
ILKINJI GEZEK DAŞARY ÝURTDAN PREZIDENTLER ÇAGYRYLDY
ABŞ-da Prezidentiň wezipesine girişmek dabarasyna adatça ilçiler we ýokary derejeli diplomatlar çagyrylýar. Döwlet Departamentiniň maglumatyna görä, daşary ýurt döwlet baştutany ABŞ-nyň Prezidentiniň wezipesine girişmek dabarasyna gatnaşmandyr.
Donald Tramp kasam kabul ediş dabarasyna daşary ýurtlaryň ýolbaşçylaryny çagyrdy. Çagyrylan liderleriň hatarynda Argentinanyň Prezidenti Hawýer Mileý, Wengriýanyň Premýer-ministri Wiktor Orban, Italiýanyň Premýer-ministri Jorja Meloni, HHR-iň Başly Si Szinpin, Paragwaýyň Prezidenti Santýago Penýa, Salwadoryň Prezidenti Naýip Bukele, Ekwadoryň Prezidenti Daniel Noboa bar.
Hawýer Mileý, Jorja Meloni, Daniel Noboa we Santýago Penýa bu çakylygy kabul etdi. Hytaý Halk Respublikasynyň adyndan bu dabara HHR-iň Başlygynyň orunbasary Han Çžen wekilçilik eder. Şeýle hem dabara Hindistanyň daşary işler ministri Subramanýam Jaşankar we Ýaponiýanyň daşary işler ministri Takesi Iwaýa gatnaşar.
Trampyň kömekçileriniň habar bermegine görä, Tramp wezipesine girişendne soňra 50 bilen 100 arasynda kararlara gol çeker. Bu kararlar energetika, ekologiýa, migrasiýa, ykdysadyýet, söwda we gender syýasaty ýaly ugurlary öz içine alýar.
2017-nji ýylda Tramp wezipesine girişenden soňra diňe saglygy goraýyş ulgamyna degişli bir karara gol çekipdi.
Tramp ABŞ-nyň taryhynda iň ýokary döwlet wezipesini bir arakesmeden soňra eýeleýän ikinji Prezident bolar. Mundan ozal, Grower Kliwlend 1885-1889-njy we 1893-1897-nji ýyllarda degişlilikde ABŞ-nyň 22-nji we 24-nji Prezidenti bolupdy.
Doland Tramp hem ABŞ-nyň 45-nji we 47-nji Prezidenti bolar.