Mälim bolşy ýaly, ýene-de 5 günden, has takygy 20-nji noýabrda futbol boýunça dünýä çempionaty Katarda badalga alýar. Ýakyn Gündogar sebitinde ilkinji gezek geçirilýän, şeýle hem ilkinji gezke güýz-gyş paslynda gurnalýan dünýä çempionaty köp sanly janköýerleri sabyrsyzlandyrýar.
Bu dünýä çempionatyna daşary ýurtly syýasatçylaryň hem gatnaşmagyna garaşylýar. ABŞ-nyň daşary işler ministri Entoni Blinkeniň 21-nji noýabrda geçiriljek ABŞ-nyň milli ýygyndysy bilen Uelsiň milli ýygyndysynyň arasyndaky duşuşyga gatnaşjakdygy mälim edildi.
Şeýle hem Blinken bu saparyň çäklerinde Kataryň ýolbaşçylary bilen duşuşyklar geçirer.
Mundan başga-da, Beýik Britaniýanyň daşary işler ministri Jemýs Klewerliniň hem 20-nji noýabr-18-nji dekabr aralygynda geçirilýän dünýä çempionatyna gatnaşmagyna garaşylýar.
Fransiýanyň Prezidenti Emmanuel Makronyň bolsa, Fransiýanyň milli ýygyndysynyň görkezjek netijelerine görä, dünýä çempionatyna gatnaşmagyna garaşylýar.