Birleşen Milletler Guramasynyň COP31 howa maslahaty 9-njy noýabrda Antalýada öz işine başlady. Türkiýe ilkinji gezek bu halkara forumyň geçirilýän ýeri boldy. Duşuşyklar we gepleşikler 20-nji noýabra çenli dowam eder.
Türkiýäniň Daşky gurşaw, şähergurluşyk we howanyň üýtgemegi boýunça ministrliginiň maglumatlaryna görä, maslahata 102 döwletiň Baştutanynyň we 300-den gowrak ministriň gatnaşjakdygy tassyklandy. Umuman, 196 ýurtdan we Ýewropa Bileleşiginden wekiliýetleriň gatnaşmagyna garaşylýar.
Döwlet we hökümet Baştutanlarynyň sammiti 11–12-nji noýabrda Gök zolakda (Blue Zone) geçiriler. Oňa Türkiýäniň Prezidenti Rejep Taýyp Ärdogan başlyklyk eder. Kabul ediji tarapdan COP31 maslahatynyň işine daşky gurşaw, şähergurluşyk we howanyň üýtgemegi ministri Murat Kurum ýolbaşçylyk eder.
Ara alyp maslahatlaşmalaryň esasy ugurlary arassa energiýa geçmek, azyk howpsuzlygyny üpjün etmek, howanyň üýtgemegine durnukly şäherleri ösdürmek, ýaşyl senagatlaşma we galyndylary azaltmak meseleleri bolar. Gatnaşyjylar, şeýle hem, ummanlary we deňizleri goramak, saglygy goraýyş ulgamlarynyň durnuklylygyny ýokarlandyrmak meselelerine serederler.
Türkiýe amaly netijeleri gazanmaga aýratyn üns bermegi meýilleşdirýär. Kabul ediji tarap tarapyndan hödürlenen «Amaly hereketleriň COP-y» konsepsiýasy howa boýunça kabul edilen borçnamalardan anyk taslamalara we çözgütlere geçmegi göz öňünde tutýar.
Maslahaty geçirmek üçin 1,1 million inedördül metr meýdanly çäk taýýarlandy. Ol iki bölege bölünýär. Gök zolakda döwlet wekiliýetleriniň we halkara guramalarynyň gatnaşmagynda resmi gepleşikler geçiriler. Ýaşyl zolak bolsa işewürlik, ylym, jemgyýetçilik guramalary we ýaşlar ulgamynyň wekilleriniň taslamalaryny hem-de çözgütlerini tanyşdyrmak üçin niýetlenendir.
Guramaçylar Gök zolakda 100 müňe golaý, Ýaşyl zolakda bolsa 1,5 milliona çenli myhmanyň bolmagyna garaşýarlar. Mundan başga-da, konferensiýa gatnaşmak üçin 154 ýurtdan 45 müňden gowrak meýletinçisi hasaba alyndy.
Gepleşiklerden başga-da, maslahatyň maksatnamasy ekologik, bilim we medeni çäreleri, durnukly ösüş, biologik dürlüligi gorap saklamak hem-de galyndylary azaltmak meselelerine bagyşlanan sergileri we tanyşdyryş çärelerini öz içine alýar.
Aýratyn bölüm durnukly gastronomiýa bagyşlanar. Onuň çäklerinde myhmanlara Türkiýäniň ýedi sebitiniň milli aşpezlik däpleri tanyşdyrylar.