Türkiýäniň Alanýa şäherinde Küresel Gazeteciler Konseýiniň (KGK) guramagynda geçirilýän 6-njy Global Media Duşuşygynyň çäklerinde Halkara media geňeşiniň we halkara wekilleriň duşuşygy geçirildi. Duşuşykda öňe sürlen esasy başlangyçlaryň biri KGK-nyň halkara habarlar agentligini döretmek baradaky teklip boldy.
Maslahata KGK-nyň başlygy Mehmet Ali Dim, Halkara media geňeşiniň agzalary we dünýäniň dürli ýurtlaryndan gelen köpçülikleýin habar beriş serişdeleriniň wekilleri gatnaşdylar.
Duşuşygyň dowamynda halkara media hyzmatdaşlygyny ösdürmek, žurnalistleriň arasynda maglumat we tejribe alyşmagy giňeltmek, şeýle hem dürli ýurtlaryň habar beriş serişdeleriniň arasynda bilelikdäki taslamalary durmuşa geçirmek meseleleri ara alnyp maslahatlaşyldy.
Maslahatda KGK-nyň halkara habarlar agentligini döretmek teklibi aýratyn üns merkezinde boldy. Bu başlangyç dürli ýurtlardaky media wekilleriniň arasynda maglumat alyşmagy ýeňilleşdirmäge, halkara habarlar ulgamynda hyzmatdaşlygy ösdürmäge we žurnalistleriň özara gatnaşyklaryny berkitmäge gönükdirilendir.
Halkara wekiller öz çykyşlarynda media ulgamynda hyzmatdaşlygy ösdürmek, maglumatlaryň ygtybarlylygyny üpjün etmek, täze sanly mümkinçiliklerden peýdalanmak we bilelikdäki media taslamalaryny durmuşa geçirmek boýunça dürli teklipleri öňe sürdüler.
Duşuşyga Türkmenistanyň wekili hökmünde «Atavatan Media» habarlar toparynyň baş redaktory, hukuk ylymlarynyň doktory Döwran Orazgylyjow hem gatnaşdy.
Türkmenistanyň wekili maslahatda çykyş edip, halkara media hyzmatdaşlygyny has-da giňeltmek, dürli ýurtlaryň žurnalistleriniň arasynda yzygiderli maglumat alyşmagy ýola goýmak we media ulgamynda bilelikdäki başlangyçlary ösdürmek boýunça öz tekliplerini beýan etdi.
Duşuşykda häzirki zaman žurnalistikasynda sanly tehnologiýalaryň we emeli aňyň döredýän mümkinçilikleri, şeýle hem halkara habarlar ulgamynda özara hyzmatdaşlygyň ähmiýeti barada pikir alşyldy.
Bellenilişi ýaly, KGK-nyň halkara habarlar agentligini döretmek baradaky başlangyjy durmuşa geçirilen halatynda, dürli ýurtlarda işleýän žurnalistleriň we habar beriş serişdeleriniň arasynda maglumat alyşmagyň täze mümkinçilikleri döräp biler.
Ýeri gelende bellesek, Alanýa şäherinde geçirilýän 6-njy Global Media Duşuşygyna dünýäniň 32 ýurdundan 350 žurnalist we media wekili gatnaşýar.
Bu halkara çäre dürli ýurtlaryň žurnalistleriniň arasynda gatnaşyklary berkitmäge, media ulgamyndaky möhüm meseleleri ara alyp maslahatlaşmaga we täze hyzmatdaşlyk mümkinçiliklerini döretmäge gönükdirilendir.
Atavatan Media | Alanýa, Türkiýe