Türkmenistanda ýokary okuw mekdeplerine resminama tabşyrýan dalaşgärler üçin kabul ediş möwsüminiň ýagdaýyny yzarlamaga mümkinçilik berýän täze onlaýn hyzmat işe başlady. dalasgar.bilim.tm portalynda resminamalaryň kabul edilişi barada iň täze maglumatlar ýerleşdirilýär.
Platformada ýurduň 22 sany öňdebaryjy ýokary okuw mekdebi barada maglumatlar elýeterlidir. Onda her gün tabşyrylan arzalaryň sany täzelenýär, şeýle hem tassyklanan kabul ediş meýilnamalary we birinji ýyl talyplary üçin bölünip berlen orunlar baradaky maglumatlar ýerleşdirilýär.
Mundan başga-da, hyzmat arkaly bäş welaýat, Aşgabat şäheri we Arkadag şäheri boýunça kabul ediş statistikasy bilen hem tanyşmak bolýar.
Täze sanly çeşmäniň ýokary okuw mekdeplerine kabul ediş işini has aç-açan we amatly edip, dalaşgärler hem-de olaryň ene-atalary üçin peýdaly bolmagyna garaşylýar.
Türkmenistanyň ýokary we orta hünär okuw mekdeplerine okuwa kabul etmegi 2026-njy ýylyň 13-nji iýuly — 24-nji awgusty aralygynda guramak, okuwa kabul etmek boýunça giriş synaglaryny ýokary we orta hünär okuw mekdepleriniň ýerleşýän ýerinde geçirmek bellenilipdi.