Türkmenistanyň Koreýa Respublikasyndaky Ilçihanasynyň başlangyjy bilen, Koreýanyň abraýly «Diplomacy» žurnaly mart aýyndaky sanynda ýurdumyzyň daşary syýasy işjeňligine degişli giňişleýin syny çap etdi. Ýöriteleşdirilen neşiriň nobatdaky sany «Halkara parahatçylyk we ynanyşmak ýyly» şygary astynda geçen ýylyň jemlerine bagyşlandy. Neşirde Türkmenistanyň halkara giňişliginde abraýyny pugtalandyrmak we konstruktiw halkara gepleşiklerini ösdürmek ugrundaky yzygiderli ädimleri bellenilip geçilýär.
Redaksiýanyň üns merkezinde Aşgabadyň özara hormat goýmak medeniýetini öňe sürmäge we durnukly ösüş maksatnamalaryny durmuşa geçirmäge gönükdirilen giň gerimli başlangyçlary durýar. Bu strategiýany durmuşa geçirmekde türkmen paýtagtynda geçirilen ýokary derejeli halkara forumy möhüm tapgyr boldy. Türkmenistanyň Prezidenti Serdar Berdimuhamedowyň we türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň bu çärä gatnaşmagy, Aşgabadyň dünýä howpsuzlygyny pugtalandyrmagyň ýollaryny ara alyp maslahatlaşmak üçin möhüm meýdança bolup durýandygyny tassyklady.
Türkmenistanyň başlangyçlarynyň ählumumy derejesi Birleşen Milletler Guramasynyň Baş Assambleýasynyň 80-nji sessiýasynda hem tassyklanyldy. Döwlet Baştutanynyň bu foruma gatnaşmagy ýurduň köptaraplylyk we bitaraplyk ýörelgelerine ygrarlydygynyň nobatdaky subutnamasy boldy. Dünýä bileleşigi bilen işjeň hyzmatdaşlygyň dowamy hökmünde, «Awaza» milli syýahatçylyk zolagynda BMG-niň deňze çykalgasy bolmadyk ösüp barýan döwletler boýunça üçünji maslahatynyň geçirilmegi bellärliklidir. Türkmenistanyň kabul ediji tarap hökmünde saýlanylmagy, ýurduň ulag ulgamynyň özara arabaglanyşygyny ösdürmekde we möhüm logistika merkezi hökmündäki abraýyny pugtalandyrmakda gazanan üstünlikleriniň halkara derejesinde ykrar edilmegidir.
Köptaraply formatlar bilen bir hatarda, žurnal Koreýa Respublikasy bilen ikitaraplaýyn gatnaşyklaryň okgunly ösüşine hem aýratyn üns berýär. Ýokary derejedäki gepleşikler tehnologiýa, ykdysady we ynsanperwerlik ulgamlarynda hyzmatdaşlygy giňeltmek üçin uly mümkinçilikleriň bardygyny ýüze çykardy. Bu gatnaşyklaryň logiki netijesi hökmünde, Türkmenistan bilen Koreýa Respublikasynyň arasynda ilkinji göni ýolagçy awiagatnawlaryň ýola goýulmagy boldy. Bu ädim diňe bir işewür gatnaşyklary ýönekeýleşdirmän, eýsem medeni we syýahatçylyk alyş-çalyşy üçin hem täze mümkinçilikleri döredýär, bu bolsa ýurdumyzyň alyp barýan daşary syýasy ugrunyň üstünliklidigini tassyklaýar.